25 августа 2010 г.
ФИЗКУЛЬТУРНИК кунне халалланă уяв районта хаваслă та интереслĕ иртрĕ. Спорта юратакансем Шăмăршăри "Туслăх" физкультурăпа спорт комплексĕ умне йышлăн пухăнчĕç. Спортсменсене спорта юратса çĕнĕ çитĕнÿсем тума район пуçлăхĕн çумĕ Г.Н.Обаськин ырă сунчĕ.
Ăмăртусем хĕрÿ иртрĕç, кашниех çĕнтерÿçĕ ятне çĕнсе илессишĕн вăйне шеллемесĕр тупăшрĕ. Мини-футболла выляса пĕрремĕш вырăна "Çĕнĕ Шăмăршă" команда йышăнчĕ, иккĕмĕшпе виççĕмĕш вырăнсенче – Шăмăршăпа Чукал ял поселенийĕсен командисем. Стрит-баскет енĕпе ăнăçу Шăмăршă ял поселенийĕн командинче пулчĕ, вĕсем мала тухрĕç. Анат Чаткаспа районти халăха социаллă пулăшу паракан центр командисем – иккĕмĕшпе виççĕмĕш.
Кире пуканĕ çĕклекенсем те шăл çыртсах тупăшрĕç. Кунта С.Угарин (Пăчăрлă Пашьел), А.Любимов (районти тĕп больница), Е.Укин (Пăчăрлă Пашьел) палăрчĕç.
Шахматистсем хушшинче Шăмăршă шкулĕшĕн вылякан Н.Куприяновран ăстараххи пулмарĕ. Иккĕмĕшпе виççĕмĕш – Г.Обаськинпа ("Администрация" команда) Г.Никитин (Шăмăршă ял поселенийĕ). Шашкăлла вылякансенчен Г.Елисеев (Карапай Шăмăршă), Н.Поликарпов ("Елочка" команда), Л.Кузьмин (Шăмăршă) пуринчен те лайăхрах выляса малти виçĕ вырăна пайларĕç.
Вĕрен туртас енĕпе "Елочка" командăна парăнтараканни пулмарĕ. "Çĕнĕ Шăмăршăпа" Шăмăршă ял поселенийĕн командисен иккĕмĕшпе виççĕмĕш вырăнсемпе çырлахма тиврĕ.
Çăмăл атлетика эстафети чупакансене те, куракансене те кĕтменлĕхсемпе тĕлĕн-терчĕ те, савăнтарчĕ те. 4х200 метрлă дистанцире Карапай Шăмăршă ял поселенийĕн команди çĕнтерÿçĕ пулчĕ. Вĕсем хыççăн финиша Пăчăрлă Пашьел тата Шăмăршă ял поселенийĕсем çитрĕç.
60 метра чупса пĕрремĕш вырăнта Г.Александров (Карапай Шăмăршă) иккĕмĕшĕнче – В.Вашуркин (Шăмăршă), виççĕмĕшĕнче – А.Петров (Карапай Шăмăршă). Хĕрсем хушшинче О.Герасимова (Шăмăршă) пĕрремĕш, А.Ишмуллинăпа О.Уськина иккĕмĕшпе виççĕмĕш (иккĕшĕ те Пăчăрлă Пашьелĕнчен ).
Ăмăртусене пĕтĕмĕшле илсе шутласан, чи нумай очко пухса Шăмăршă ял поселенийĕн команди пĕрремĕш вырăна тухрĕ. Иккĕмĕш – Карапай Шăмăршă ял поселенийĕн команди, виççĕмĕш – Пăчăрлă Пашьел ял поселенийĕн команди. Организаци, предприяти, учреждени командисем хушшинче малти виçĕ вырăна "Елочка", районти тĕп больница, районти халăха социаллă пулăшу паракан центр командисем йышăнчĕç.
Çакна та асăнса хăвармалла: районти масăллă спорта аталантарас тĕлĕшпе тăрăшакансене, ăмăртусенче палăрса тăракансене райадминистрацин вĕрентÿ, çамрăксен политики тата культура пайĕн Хисеп грамотисемпе тата "Единая Россия" партин Тав çырăвĕсемпе наградăларĕç.