28 августа 2010 г.
АВГУСТĂН 25-мĕшĕнче районти учительсен йăлана кĕнĕ конференцийĕ иртрĕ. Ун ĕçне район пуçлăхĕ В.П.Фадеев, ЧР ял хуçалăх министрĕн çумĕ С.П.Димитриев, ЧР вĕрентÿпе çамрăксен политикин министерствин пĕтĕмĕшле вĕренÿ пайĕн ертÿçи А.П.Михайлов, райадминистрацин вĕрентÿ, çамрăксен политики тата культура пайĕн пуçлăхĕ Н.Г.Игнатьева, районти вĕрентекенсемпе чĕннĕ хăнасем хутшăнчĕç.
Кăçалхи конференци "Вĕрентекен çулĕ" тата "Вĕрентекенĕн хальхи обществăри вырăнĕ" девизпа иртрĕ. Кун йĕркинче райадминистрацин вĕрентÿ, çамрăксен политики тата культура пайĕн пуçлăхĕн Н.Игнатьеван "Паянхи шкулти вĕрентекен, унăн портречĕ, çитменлĕхĕсемпе çитĕнĕвĕсем" доклачĕ, районти "Чи лайăх шкул" конкурса, шкул ачисен Спартакиадине пĕтĕмлетесси, вĕрентÿ ĕçĕнче пысăк хастарлăхпа пуçарулăх кăтартнă ĕçченсене наградăласси пулчĕ.
Доклада сÿтсе явма Анат Чаткас шкулĕн директорĕ Л.Нянина, Шăмăршă шкулĕнчи акăлчан чĕлхине вĕрентекенĕ И.Кудряшова, Палтиел шкулĕн чăваш чĕлхипе литература вĕрентекенĕ З.Свеклова хутшăнчĕç.Çавăн пекех учительсене саламласа педагогика ĕçĕн ветеранĕсем Н.Г.Павловпа А.И.Гармонщиков сăмах каларĕç.
Конференцире педагогика ĕçĕнче хастарлăхпа тата пуçарулăхпа палăрнă учительсене Хисеп грамотисемпе наградăларĕç. Республика конкурсĕнче мала тухнă З.Свекловапа (Палтиел шкулĕн вĕрентекенĕ) Ю.Ермолаева (Карапай Шăмăршă шкулĕн директорĕ) хавхалантаракан укçана илмелли свидетельствăсене пачĕç.
Конференци уяв концерчĕпе вĕçленчĕ.