08 сентября 2010 г.
– Кĕр тыррисене эпир 500 гектартан кая мар акасшăн, – терĕ "Мир" ЗАО ертÿçи З.Афиятуллов. – Хальлĕхе 100 гектар ырашпа 130 гектар тулă акрăмăр. Çак эрнере кĕр акине вĕçлетпĕрех.
Акара, ытти çулсенчи пекех, М.Фахрутдинов механизатор пурне те ырă тĕслĕх кăтартать.
– Кĕр акине кĕске вăхăтра тата пысăк пахалăхпа ирттермелле, – пĕлтерчĕ Мерван. – Кая юлса аксан тухăç кĕтмелли çук. Минерал удобренийĕпе туллин усă куратпăр, çунтармалли-сĕрмелли материалсем çителĕклĕ.
Кĕр тыррисен вăрлăхĕсене ытти регионсенчен кÿрсе килеççĕ.
М.Куропаткинпа А.Садертдинов сеяльщиксене те мухтамалла. Агзам иртнĕ уйăхра çеç "Дон" комбайнпа тыр-пул пуçтарса кĕртнĕ. "Хир карапне" техника паркне упрама ларсанах сеялка çине ларнă.
Агрегат патне вăрлăх турттарса тăракан В.Паймин пирки те ырă сăмахсем çеç каламалла. Вырмара та, акара та маттур вăл, хăйне шанса панă автомашинăна яланах юсавлă тытать.
Çĕр хатĕрленĕ çĕрте Д. Ибрагимова А.Минуллов механизаторсем тăрăшса ĕçлеççĕ. Тăпрара нÿрĕк сахал, çавăнпа та хатĕр çĕр çине хăвăртрах акса хăварасшăн Палтиелсем.
Çитес çулхи тухăç çинчен те халех шутлаççĕ: К-700 тракторпа ĕçлекен М.Тизяков 100 гектар ытла çĕртмене сухаланă ĕнтĕ. Акаран пушансан ытти тракторсем те сухалĕç.
"Районти хуçалăхсенче кĕр аки начар мар пырать, – терĕç мана район администрацийĕн агропромышленноç пайĕнче. – "Шанс", "Исток", "Карлинская" Агрофирма", "Агросервис" хуçалăхсем Чăваш Республикин апат-çимĕç фондĕнчен элита кĕрхи тулă вăрлăхне туянма майсем тупни те савăнтарать. Кивелнĕ вăрлăхсене çĕннисемпе улăштарни районти çĕр ĕçченĕсем мал ĕмĕтлĕ пулнине çирĕплетет".
... Палтиелĕнче пулнă чух шăпăр-шăпăр çумăр çума пуçларĕ.
Анчах хирте ĕçлекен механизаторсем трактор кабинисене тарса кĕме васкамарĕç, тахçантанпах тÿсеймесĕр кĕтекен çумăр тумламĕсене ылтăн пĕрчисене илнĕ пек ывăçласа сăрхăнтарчĕç. Пĕлесчĕ сирĕн, мĕнешкел телейлĕччĕ вĕсен сăн-пичĕсем!