11 сентября 2010 г.
Республика парламенчĕн августăн 29-мĕшĕнче уçăлнă сессийĕ сентябрĕн 8-мĕшĕнче малалла ĕçленĕ. Депутатсем пысăк пĕлтерĕшлĕ ыйтусене татса панă.
Чăваш Ен Президенчĕ республикăн Министрсен Кабинечĕн Председателĕн должноçне йышăнма Н.Суслонова кандидатурине сĕннĕ. Çак утăма сăлтавланă май Михаил Игнатьев Нина Владимировна премьер должноçĕнче маларах 5 уйăх ĕçлени çинчен пĕлтернĕ. Çапла вара ку ĕçре хăйне кăтартма ĕлкĕрнĕ темелле. Михаил Васильевич шухăшĕпе, ăнăçусем пур, вăл Федераци министерствисемпе çыхăну йĕркелеме пултарнă, çакă республикăна инвестицисем илсе килмешкĕн пулăшĕ. "Эсир республикăна аталантарма, Чăваш Енре пурăнакансен пурнăç пахалăхне çĕклеме тĕрĕс йышăну тăвасса шанатăп!" – тенĕ М.Игнатьев.
Паллах, Нина Владимировнăна хăйне те сăмах панă. Вăл маларах палăртнă плансене пĕрле пурнăçлас шухăшли çинчен каланă. 2010 çул ансат марри çинче те чарăнса тăнă: шăрăх та типĕ çанталăк нумай чăрмав кăларса тăратрĕ. Çавна май Правительствăн центртан хушма пулăшу илес тĕллевпе нумай ĕçлеме тивнĕ, тивĕ. Пушарсен сиенне пĕтерме 300 млн, тыр-пул пĕтнипе çыхăннă сиене саплаштарма 700 млн тенкĕ ытла илме пултарни – чăннипех ăнăçу. Н.Суслонова çавăн пекех пурăнмалли çурт-йĕре юсас, çынсене кивĕ çуртсенчен куçарас енĕпе, ветерансене хваттерсемпе тивĕçтерес тĕлĕшпе пысăк ĕç туни çинче чарăнса тăнă. Çĕр-шыв шайĕнче монохуласене аталантармалли программăна хутшăнма пултарнипе те мăнаçланмалла. Сăмах Çĕнĕ Шупашкар пирки пырать: "Хĕвел айлăмĕпе", БОСпа, хытă каяшăн полигонĕпе çыхăннă проект – нумай миллиард тенкĕлĕх. Пысăк пĕлтерĕшлĕ самантсен ретĕнче вăл çавăн пекех ачасене садиксемпе тивĕçтерес енĕпе тăвакан тата тумалли ĕçе палăртнă. Çитес çулах тата 11 ача сачĕ хута каймалла. Республикăра пĕтĕмпе вара 14 пин ача садикре вырăн кĕтет, çав шутран 9 пинĕшĕ – Шупашкарта. Çавна май 20-мĕш çулччен 40 ача сачĕ тума палăртни ыйтăва татса пама тивĕç.
Н.Суслонова кандидатуришĕн сасăламалли вăхăт çитнĕ. 37-ĕн – майлă, 5-ĕн – хирĕç, 2 депутат тытăнса тăнă. Михаил Михайловский спикер Нина Владимировнăна "тивĕçсене пурнăçлаканран" Правительство пуçлăхĕ пулса тăнă ятпа саламласа пысăк та илемлĕ чечек çыххи парнеленĕ.
Николай Федоров Президент должноçĕнчен кайнă хыççăн ăçта ĕçлĕ текен ыйту нумай çынна темиçе уйăх кăсăклантарчĕ – çак сессире хуравĕ уçăмланнă. М.Игнатьев Президент ăна республикăн ĕç тăвакан влаç органĕнчен РФ Федераци Канашĕн членĕ пулма сĕннĕ – указ кăларнă. Йĕрки çапла: парламент килĕшĕвĕ те кирлĕ.
Николай Васильевич Федераци Пухăвĕн çÿлти палатинче Чăваш Енĕн унчченхи представителĕн В.Слуцкерăн вырăнне йышăнать.
Депутатсем Николай Васильевича хăйне те итленĕ: "Манăн Мускавра ĕçлесе пухнă опыт, пĕлÿ, çĕр-шыв ертÿçисемпе, çав шутра Президентпа, Правительство пуçлăхĕпе, Федераци министрĕсемпе йĕркеленĕ ырă хутшăнусем çак ĕçре пулăшĕç. Вĕсем мана, сире, манăн пултарулăха пĕлеççĕ. Çакăнпа пĕтĕмпех эсир усă курма пултаратăр".
Сасăланă: Н.Федоров сенатор пулассипе 38 депутат килĕшнĕ – парламент ăна Федераци Канашĕнче Чăваш Ен интересĕсене хÿтĕлеме мандат панă.