18 сентября 2010 г.
РАЙОН çыннисем, уйрăмах спорта юратакансем, В.Ефимов ятне яланах асра тытаççĕ. Вăхăтсăр çĕре кĕмен пулнă пулсан, Василий Михайлович халĕ те физкультурăпа спорт юхăмне аталантарас тĕлĕшпе çине тăрса тăрăшнă пулĕччĕ те – шел, унăн шăпи урăхларах килсе тухрĕ... Çавах та, ырă çын хăй хыççăн ырă ят хăварать. Ахальтен мар ĕнтĕ хăй вăхăтĕнче районти «Урожай» ирĕклĕ спорт обществине ертсе пынă В.Ефимова асăнса мини-футболла выляса ун ячĕллĕ Кубока çĕнсе илессишĕн турнир ирттересси çирĕп йăлана кĕчĕ.
Кăçалхи ăмăртăва сакăр команда хутшăнма кăмăл тунă. Турнира, яланхи пекех, кĕçĕн çулхи шкул ачисен командисем пуçларĕç. Кашни тĕл пулăвах интереслĕ иртрĕ темелле. Ăсталăхĕсем çитсех каймаççĕ пулин те, çамрăк спортсменсем хăйсене май килнĕ таран лайăх енчен çеç кăтартма тăрăшрĕç. Çĕнтерни мар, ăмăртăва хутшăнни хăех пысăк пĕлтерĕшлĕ тенине тĕпе хурса судьясен коллегийĕ кашни ачанах ятарлă парнепе хавхалантарма тăрăшрĕ.
Турнир Олимп системипе иртрĕ: вăйăра çĕнтернĕ команда черетлĕ тура тухать. Акă, çурма финал. Площадкăра – Шăмăршăри «Колосок» тата карапайшăмăршăсем. Пытармалли çук: шăмăршăсем çулĕсемпе çамрăкрах та, çавăнпа çивĕчрех те вăр-вартарах. Çакă вĕсене виççĕмĕш вырăн çĕнсе илме май пачĕ. Карапайсене вара шел: вĕсем малтанхи икĕ вăййа никам та çĕнтерейменнипе вĕçленĕччĕ. Çавна май судьясем иккĕшĕнче те пенальти тапмалла турĕç. Анчах юлашкинчен тенĕ пек вĕсенчен ăнăçу вĕçерĕнчĕ...
В.Ефимовăн ентешĕсем – çĕнĕшăмăршăсем – финала Шăмăршăри «Центра» çĕнтерес ĕмĕтпех çивĕч пуçларĕç, апла пулин те Кубока виççĕмĕш çул шăмăршăсенчех хăварчĕç. Хальхинче – яланлăхах упрамалăх. Иккĕмĕш вырăн та – начар мар кăтарту.
Судьясен коллегийĕ турнирти чи лайăх футболистсене те палăртрĕ. Чи лайăх вратарь – Р.Бахитов («Центр»), чи лайăх çурма хÿтĕлевçĕ – А.Хафизов («Центр»), чи лайăх хÿтĕлевçĕ – А.Герасимов (Çĕнĕ Шăмăршă), чи лайăх тапăнса вылякан – М.Поляков (Çĕнĕ Шăмăршă). Çĕнтерÿçĕ командăсем Хисеп грамотисене, ятарлă медальсене тата асăну футболкисене тивĕçрĕç.
В.Ефимовăн мăшăрĕ Лариса Харитоновна турнира йĕркелесе ирттерме спонсор пулăшăвĕ панăшăн «Агродор» ОООна, Чăваш Республикин Патшалăх Канашĕн депутатне А.Максимова, В.Любимов, С.Галкин, О.Хлюкин предпринимательсене, Шăмăршăри В.Фадеева, сĕт-çу завочĕн, газ участокĕн, çул-йĕр участокĕн коллективĕсене хаçат урлă чун-чĕререн тав тума ыйтрĕ.