25 сентября 2010 г.
ЧР Экономика аталанăвĕн, промышленноç тата суту-илÿ министерстви вырăнти хăй тытăмлăх органĕсем мĕн пур хулапа районта ирттерекен хаксен мониторингне пĕтĕмлетет. Вĕсем хуласенче кăна мар, ялсенче те ÿснĕ.
Раççей Президенчĕ Д.Медведев ертсе пынипе сентябрĕн 21-мĕшĕнче Мускавра агропромышленноç ыйтăвĕпе ирттернĕ канашлура РФ ял хуçалăх министрĕ Е.Скрынник: "Çĕр-шывра тырă çителĕклĕ. Кăçал пÿлмене 60-65 миллион тонна хыватпăр. Пĕлтĕрхи 26 миллион пур. 77 миллион потребительсене туллин тивĕçтерме май парать", – тенĕ.
Паянхи кун тĕлне çĕр-шывĕпе 51 млн тонна пухса кĕртнĕ. Лăпланма иртерех. Çителĕклĕ тĕк мĕншĕн тырă, кĕрпе, çăнăх хакланчĕ; Айăплисене часах тупрĕç. Пĕрисем – "спекулянтсене", теприсем информацин йышлă хатĕрне вăрçаççĕ.
Августăн 11 – сентябрь уйăхĕн 17-мĕшĕсенче тырă хакĕ вăтамран Санкт-Петербургра – 1,6, Псковра – 1,4, Тверьте –1,5, Чулхулара – 1,8, Чăваш Енре –1,9, Чĕмпĕрте – 2,1, Тутарстанра –1,9, Ставропольпе Краснодарта 1,2 хут ÿснĕ.
Сентябрь уйăхĕн малтанхи 10 кунĕнче 3 класлă туллăн кашни тонни вăтамран федерацин Атăлçи округĕнче – 6623, Кăнтăр округĕнче – 6190, Уралта – 6442, Çĕпĕрте – 5746, Тĕп округра 6363 тенкĕ тăнă. "Чăваштырăпродут" предприяти 3-мĕш класлă туллăн (клейковина 23-28 проц. (пĕр тоннине 6600-7000, 4-мĕш класлине (клейковина 18-22 проц.) 6400-6700, 5-мĕш класлине (клейковина15-17 проц.) – 6000. А ушкăнри апатлăх ыраша 4400-5000 тенкĕлле йышăнать. Чи лайăх сортлă шурă çăнăхăн кашни тоннине 11000-15000, 1-мĕш сортлине –10200, 2-мĕш сортлине 8700 тенкĕпе сутать.
Чăвашстат пĕлтернĕ тăрăх – республикăра сентябрь уйăхĕн 6-12-мĕшĕсенче маларахри эрнерипе танлаштарсан çăмарта хакĕ – 5,8, хура тул –5,1, вир кĕрпи – 4,3, сахăр – 2,5, тип çу – 1, 9, услам çу – 1,6, шурă çăнăх – 1,3, вермишель 0,9 проц. ÿснĕ.
Çулталăк пуçланнăранпа çĕр улми хакĕ – 2, 5, кишĕр – 2,3, купăста – 2,4, пуçлă сухан –1,3, вир кĕрпи –1,4 хут, пастеризациленĕ сĕт – 24,9, хура çăкăр тата хурапа шурă çăнăхран пĕçернĕ çăкăр 22,5 проц. хăпарнă.
Рф Президенчĕ ирттернĕ канашлура хура тул (вăл республикăра – 2,5хут, ытти регионта ытларах та хакланнă) ыйтăвне çивĕччĕн сÿтсе явнă. Чăваш Республикин Апат-çимĕç фончĕ Чăваш Ене 300 тонна пахча çимĕç тата "иккĕмĕш çăкăр" кÿрсе килме палăртнă. Вырăнти хăй тытăмлăх органĕсен тата республика шайĕнче иртекен ларусене ял хуçалăх культурисем лайăх пулнă регионсенчен пахча çимĕç, çĕр улми туянма миçе тенкĕ уйăрнинчен, миçе автомашина кăларса янинчен, республикăна тиевлĕ вакун миçе çитнинчен, пасарсенче çĕр улми, пахча çимĕç сутакан миçен пулнине пĕлтернинчен пуçласан лайăхчĕ. Хусан хули Беларуçрен 40 пин тонна тата Алтай крайĕнчен 60 пин тонна çĕр улми илсе килесси çинчен пĕлтернĕ. Çакнашкал килĕшÿсем пире те кирлĕ.