29 сентября 2010 г.
2010 çулхи августăн 23-мĕшĕнче район сучĕн ларăвĕнче Энтĕрьелĕнче пурăнакан Л.В. Трофимова почтальонка хăйне шанса панă пурлăха вăрланă фактсемпе çыхăннă уголовнăй ĕçе пăхса тухнă.
Федераци почта çыхăнăвĕн Чăваш Республикинчи управленийĕнчи Елчĕк почтамчĕн Шăмăршăри уйрăмĕнчи Л.В. Трофимова почтальонка хăйĕн ĕç вырăнĕпе усă курса пенсионерсене тивĕçекен укçа-тенке хăйĕн валли илсе преступлени çулĕ çине тухнă. Вăл 2006 çулхи январьтен пуçласа 2010 çулхи февральччен Энтĕрьелĕнчи М.В. Пугачева пенсионеркăшăн алă пусса, коммуналлă пулăшусемшĕн тивĕçекен укçана – пĕтĕмĕшле сумма 27 пин те 890 тенкĕпе танлашать – хăй валли илсе пынă. Почтальонка çавăн пекех çак пенсионеркăнах 3 уйăхшăн пенси укçи паман – поручени çине ултавлă майпа алă пусса (подделка подписи) укçана хăй валли хăварнă. Тÿлемен пенси укçин сумми 15 пин те 504 тенкĕпе танлашать. Çапла вара, Л.В. Трофимова почтальонка М.В. Пугачевана пурĕ 43 пин те 394 тенкĕлĕх сиен кÿнĕ.
Çапла майпах, пенси, ытти социаллă тÿлевсен ведомоçĕсем çине ултавлă майпа хăйех алă пусса асăннă пенсионеркăн упăшкине – Н.М. Пугачева 42 пин те 752 тенкĕлĕх улталанă, çак суммăна хăй валли илнĕ. Энтĕрьелĕнчи М.Е. Егорова пенсионеркăна коммуналлă пулăшусемшĕн тивĕçекен укçана та (28 пин те 455 тенкĕ) паман почтальонка. Кунсăр пуçне А.В. Кисамеевана та коммуналлă пулăшу укçипе тивĕçтермен (4 пин те 590 тенкĕ). Пенси порученийĕ çине ултавлăн алă пусса, çак пенсионеркăн 2010 çулхи январьте илмелли 7 пин те 668 тенкĕ укçине те Л.В. Трофимова хăйĕн валли хăварнă.
Следстви пынă вăхăтра Л.В. Трофимован айăпне пĕтĕмпех уçса панă. Судра вăл айăплă тесе йышăннă. РФ УКĕн 160 статйин 2-мĕш пайĕмпе никĕслесе (4 эпизод тăрăх) Л.В. Трофимована 2 çуллăха условнăй майпа ирĕкрен хăтарма, 1 çул та 6 уйăхлăха тĕрĕслев срокĕ пама йышăнса хăварнă. Сăмах май каласан, Л.В.Трофимова хăй сиен кÿнĕ çынсене следстви пынă вăхăтрах каялла тавăрса пама пуçланă.