02 октября 2010 г.
Виçпÿрт Шăмăршă – республикипех паллă ял. Ятлă-сумлă çынсем сахал мар тухнă кунтан. Л. Падиаров та çакăнта çуралса ÿснĕшĕн савăнать, тивĕçлипе мухтанать: пĕрремĕш халăх писателĕ, СССР халăх артисчĕ кашни ялтанах тухмасть-çке!
Учитель çемйинче кун çути курнă Лева. Тен, шăпах çакă ăна кайран учитель профессине суйласа илме пулăшнă та пулĕ. Çемье династине малалла тăсаканĕ вăл.
Ялти сакăр çул вĕренмелли шкултан вĕренсе тухсан мал ĕмĕтлĕ каччă Шăмăршăри вăтам шкула çул тытнă, унтан лайăх паллăсемпе аттестат илсе тухнă. Малалла ăçта каймалла-ха;
Малтанласа Л.Падиаров Атăл пароходствинче рулевой помощникĕ пулса ĕçленĕ, çав хушăрах Чулхулари юханшыв транспорчĕн институтĕнче куçăмсăр майпа вĕреннĕ. Икĕ курс пĕтерсен, 1972 çулта, Лев Николаевича пароходствăпа сывпулашма тивнĕ – салтак тумне тăхăнма вăхăт çитнĕ. Çартан таврăнсан ăна комсомол райкомĕн инструкторĕ пулма çирĕплетнĕ, кайран Пуянкассинчи сакăр çул вĕренмелли шкула учитель пулма янă. Кунта вăл ачасене математикăпа физика вĕрентме тытăннă. 1981 çулта Л.Падиаров Чăваш Патшалăх педагогине институтĕнчен заочно вĕренсе тухнă, 1986-1990 çулсенче шкул директорĕн çумĕ пулса ĕçленĕ.
1990 çулта Лев Николаевич тăван яла – Виçпÿрт Шăмăрша – таврăннă. Ăна тÿрех шкул директорĕн тилхепине шанса панă. 2010 çулчченех туртнă вăл çак йывăр лава, ачасене тарăн пĕлÿ парассишĕн, вĕсенчен çĕр-шыва юрăхлă çынсем тăвассишĕн ырми-канми тăрăшнă. Хастар ĕçшĕн ăна "Раççей Федерацийĕнчи вĕрентĕвĕн хисеплĕ ĕçченĕ" паллăпа, нумай-нумай Хисеп Грамотипе чысланă.
Вĕрентекен пулнипе çеç мар, ăста шахматист пулнипе те паллă Л.Падиаров. Вăл район чемпионĕн ятне çичĕ хутчен тивĕçнĕ, республикăри турнирсене хутшăнса начар мар кăтартусемпе палăрнă, призлă вырăнсене çĕнсе илнĕ. Çакна та палăртса хăвармаллах пулĕ: Лев Николаевич хăй ĕçленĕ шкулта районта чи малтан çамрăк шахматистсен кружокне йĕркелесе янă. Унта çÿресе ăсталăха туптанисем халĕ тĕрлĕрен турнирсене хутшăнаççĕ.
Л.Падиаров, мăшăрĕпе пĕрле, икĕ хĕр çуратса çитĕнтернĕ, иккĕшне те аслă пĕлÿ панă. Халĕ вĕсем те аслашшĕн, ашшĕн ĕçне малалла тăсаççĕ. Мăнукĕсем те учительсен династине тăсас шанăç пур.
Октябрĕн 5-мĕшĕнче, шăпах Учитель кунĕнче, Лев Николаевич утмăл çул тултарать. Юбиляра тăванĕсем, çывăх çыннисем ăшшăн саламлĕç. Уншăн вара чи хакли – хăйĕн вĕренекенĕ пулнă çынсем манса кайманни, хисеплени. Мĕншĕн тесен, Л.Падиаров учитель пулмах çуралнă.