13 октября 2010 г.
1996 ÇУЛТА Шупашкарти ял хуçалăх академийĕнче агроном дипломне илсен Шăмăршă çамрăкĕ Василий Ермошкин тăван ялах – Шăмăршăна таврăннă.
Телее, тăван тăрăхрах ĕçлесе пурăнма ĕмĕтленнĕ йĕкĕт валли «Шемуршинский» совхозра специальноçпах ĕç тупăннă. Тĕп агроном тивĕçне 4 çул тÿрĕ кăмăлпа пурнăçласа пынă Василий Михайлович. Хуçалăхра реорганизаци ĕçĕсем пулса иртсен районти çамрăксемпе ачасен спорт шкулĕнче пĕр хушă тренерта тăрăшнă. Кун хыççăн «Агродор» предприятире агроном должноçĕнче ĕçленĕ. Юлашки çулсенче перекет кассинче хуçалăх енĕпе вăй хунă. Ĕç вырăнне кĕскетнĕ хыççăн вара В.Ермошкин Шăмăршăра хăйĕн пĕчĕк предприятине йĕркелеме шутлать.
– Райцентрта тракторсем валли запас пайсем сутакан пĕр ятарлă магазин кăна пулнине шута илсе, эпĕ иккĕмĕшне уçма шутларăм, – пĕлтерет Василий Михайлович. – Кăçал апрель уйăхĕнче налук службинче предприниматель ĕçне пуçăнма ирĕк паракан Свидетельство илсен унчченхи КБОн картишĕнчи складра «Дизель» лавкка уçрăм.
Çак лавккара халĕ МТЗ, Т-40, Т-25 тракторсем валли запас пайсем, узелсемпе агрегатсем туянма пулать. Заказ пулсан, вĕсене ДТ тата Т-150 маркăллă тракторсем валли те кÿрсе килме пултарать предприниматель. Тавар туса кăларакансемпе тÿреммĕн, посредниксĕр ĕçленĕ май, запас пайсен хакĕсем ытлашши пысăк мар. Фермерсем, кил хуçалăхĕнче трактор тытакансем вĕсене хапăлласах туянаççĕ. Вырсарни кунсăр пуçне, лавкка куллен 8 сехетрен пуçласа 17 сехетчен ĕçлет.
Василий Михайлович хăйĕн лавккинче тавар туянма килнĕ кашни çынна кăмăллăн кĕтсе илет, унăн ыйтăвне туллин тивĕçтерме тăрăшать.