13 октября 2010 г.
ХАЛЬХИ вăхăтра, пытармасăр каласан, ĕç тупасси çăмăл мар. Паллах, урăх ррегионсене кайса ĕçлеме пулать-ха. Унта та каллех иккĕллĕ: е ăнать, е çук; Çавăнпах пулĕ районти çамрăксем хăйсен ĕçĕсене уçма пуçларĕç.
Çакна тума патшалăх ĕçпе тивĕçтерекен центрсем урлă бизнес-проектсем хатĕрлесе панă хыççăн укçа уйăрать. Районти çак центр та ку тĕлĕшпе ăнăçлă ĕçлесе пырать. Хăйсен ĕçне йĕркелесе яракансем те сахаллăн мар. Юлашки вăхăтра кăна районти ĕçпе тивĕçтерекен центр пулăшнипе пилĕк çын предприниматель пулса тăнă. Вĕсем хушшинче мал ĕмĕтлĕ пултаруллă çамрăксем пурри савăнтарать. Çакăн пеккисен йышне Пуянкассинче пурăнакан И.Цыганова та кĕрет.
Инга парикмахера 8 çул каяллах вĕренсе тухнă. Пĕр вăхăт хушши Шăмăршăри «Элита» салонра ĕçленĕ вăл. Ун хыççăн урăх ĕçе куçнă, тĕрлĕ вырăнта ĕçленĕ. Яла юлнă хĕр, ачаранпа çĕр ĕçне, ял пурнăçне курса ÿснĕскер, тăван тăрăхран хăйĕн тантăшĕсем пек тухса каяс темен. Хăйĕн телейне çуралнă кĕтесре шырас тенĕ. Вĕренсе тухнă парикмахер патне маларах, хăйĕн ĕçне уçиччен, ялти çынсем çÿç кастарма килнех пырса çÿренĕ. Пурне те ăшă кăмăлпа кĕтсе илнĕ вăл. Хăйĕн ĕçне уçнă хыççăн та, халĕ вăл Шăмăршăри автостанцинчи «Космос» илем салонĕнче вăй хурать, Инга патĕнчен çын татăлмасть. Клиентсемпе вăл кăмăллăн калаçать, вĕсене хапăл туса йышăнать.
И.Цыганова ачаранпах илеме чунпа иленнĕ хĕр. Вăл çут çанталăка, кайăк-кĕшĕке юратать. Кашни пулăма хаклама пĕлет. Пултаруллă та маттур хĕр юрра-ташша та ăста. Тĕрĕс калаççĕ вĕт: ăста алăра ĕç вĕрет.