13 октября 2010 г.
МАТТУР та лайăх çынсемпе чăннипех пуян Пуянкасси. Хальхинче сăмахăм – В.Антонов пирки.
Çак ялта çуралса ÿснĕ Виталий Николаевич, кунтах унăн ачалăхĕпе çамрăклăхĕ иртнĕ, ĕмĕрлĕхех çакăнта тĕпленнĕ. Мĕн пĕчĕкрен ĕçе хăнăхнăскер вăл халĕ те алă усса ларма пултараймасть.
Вун тăватă çултах тăван колхозра, выльăх-чĕрлĕх ферминче ĕçлеме тытăннă Виталий, кайран Çĕпĕрти пĕр шахтăра виçĕ çул тăрăшнă. 1961-1965 çулсенче инçетри Владивостокри стройкăсенче те пилĕк авма тивнĕ ăна. Ниçта та ÿркенсе тăман чăваш каччи, пур ĕçре те яланах хăйĕн хастарлăхĕпе, ĕçченлĕхĕпе палăрса тăнă.
Вăхăт çитсен В.Антонов çар службинче пулнă, виçĕ çул салтак пăтти çинĕ. Унта та маттур, дисциплинăллă салтак пулнă вăл, тав тунисене пĕрре кăна мар тивĕçнĕ. Салтак тумне хывсан каллех ĕçе васканă Виталий Николаевич, çичĕ çул хушши ферма заведующийĕ пулнă. Организатăрла ăсталăхĕ пысăк пулнипе, çынсемпе пĕр чĕлхе тупма пĕлнипе ăна кĕçех "Правда" колхозри партин пуçламăш организацийĕн секретарĕ пулма çирĕплетнĕ. Çак хушăрах вăл автомеханик ĕçĕсене те туса пынă.
Каярахпа Виталий Николаевич утарçă ĕçĕнче те тăрăшрĕ, 2000 çулта тивĕçлĕ канăва кайрĕ. Апла пулин те ĕçсĕр лармасть: вĕсен çемйи тĕреклĕ хуçалăх тытать, йышлă выльăх-чĕрлĕх усрать.
Нумаях пулмасть В.Антонов çитмĕл çулхи юбилейне паллă турĕ. Ăна çак çула çитнĕ тесе калас та килмест: çаплипех вăр-вар та çаврăнăçуллă, ялти фольклор ушкăнĕн ĕçне те хастар хутшăнать. Вăй-хал тĕлĕшĕнчен те çирĕп – хăшпĕр çамрăксенчен те ирттерет.