16 октября 2010 г.
Йăлана кĕнĕ тăрăх октябрĕн 1-мĕшĕнче кĕрхи призыв старт илчĕ. Ку кампани вăхăтĕнче Чăваш Енри 3303 каччă салтак тумне тăхăнĕ.
Танлаштарма: кăçал çуркунне 2454 яш çар ретне тăнă. Çапла, наряд ÿссех пырать, çапах та ăна пурнăçлаççех – çапла çирĕплетеççĕ республикăри çар комиссариатĕнче. Шел те, хальхи призыв кăтартăвĕсене 1980 çулсен вĕçĕнчи демографи лару-тăрăвĕн япăхланăвĕ витĕм кÿме пултарать. Çакна РФ Хĕç-пăшаллă вăйсен тĕп штабĕн пуçлăхĕн çумĕ В.Смирнов генерал-полковник та палăртнă. Вăлах кĕрхи кампанин уйрăмлăхĕсемпе паллаштарнă. Кăçалтан пуçласа ашшĕ-амăшне призыв комиссийĕсен ларăвĕсене хутшăнма ирĕк парĕç, унта вĕсем ачин хĕсмет вăхăчĕ ăçта иртессине пĕлĕç. 2011 çултанпа каччăсене вĕсем Федерацин хăш субьектĕнче пурăнаççĕ – çавăнта вырнаçнă çар чаçĕсене яма тăрăшĕç. Унсăр пуçне кăçал правăна хÿтĕлекен организацисен представителĕсен призыв пунктĕнчен пуçласа çар чаçне çитичченех яшсемпе юнашар пулма юрать, хальлĕхе ку сăнав шайĕнче çеç пулĕ. Оборона министерстви çапла сĕнет. Хĕсмет вăхăтне улăштарма палăртмаççĕ, вăл малтанхи пекех 12 уйăха тăсăлĕ.
Студентсене те "турткаламĕç", вĕсем диплом илессе кĕтĕç.
Сăмах май, кĕçех салтак пăтти çиме пуçлакансенчен 16,8 проценчĕ аслă шкултан вĕренсе тухнă. Кăçал шкул пĕтернисенчен 70 проценчĕ вуз студенчĕ пулса тăнă, эппин, вĕсене отсрочка парĕç.