16 октября 2010 г.
ЯЛПА яла, ялпа хулана мĕн çыхăнтарать; Паллах, такăр çул. Хамăр районах илер-ха. Асфальт сарман çулсем юлмарĕç те темелле, ял урамĕсенче те йĕпе-сапара санталипех çÿреме пулать вĕт. Анчах та çакă çул-йĕр ăстисемшĕн ĕç вĕçленнĕ тенине пĕлтермест. Çын та ватăлать те, çулсем пушшех те кивелеççĕ. Пирĕн тивĕç вĕсене пăхса тăрасси, вăхăтра юсасси. Кăçал та ку тĕлĕшпе алă усса ларман: çулталăк пуçланнăранпа вунă миллион тенкĕлĕх юсав ĕçĕ пурнăçланă.
Асфальтпа бетон завочĕ те пур пирĕн. Кунти коллектива В.Вашуркин ертсе пырать. Йышĕпе пысăк мар пулин те, пысăк ĕç тăвать вăл. Кăçал кăна завод виççĕр пин тонна ытла асфальт хатĕрленĕ. Район территорийĕнчи çулсене юсанисĕр пуçне, Çĕрпÿ-Ульяновск трассăна çĕнетнĕ çĕре те хамăр продукцие сахал мар ăсатрăмăр. Потребительсем пирĕн продукцие яланах пысăк хак параççĕ. Эппин, эпир те çынсенчен кая мар ĕçлеме пĕлетпĕр. Кунта, паллах, А.Убасев мастера, Н.Захаров оператора, битум вĕретекен В.Ефимова, И.Дементьев электромонтера, Н.Сергеев бульдозериста ырăпа палăртса хăвармалла.
Çул-йĕр участокĕ яланах маттур çынсемпе палăрса тăнă. В.Кудряшов мастер, А.Родионов механик, В.Краснов грейдерист, А.Лукьянов каткист, М.Даниловпа А.Егоров рабочисем – чи лайăххисен шутĕнче. А.Стратилатов, В.Погашов, С.Григорьев водительсен хăватлă КамАЗĕсем те кашни кунах рейсра.
Хĕл çывхарнă май, çак тапхăра та хатĕрленетпĕр. Техника юсавлă. Кирлĕ материалсене те çителĕклĕ таранах янтăласа хунă, ĕç вăйĕ çитет.
Сăмахăма вĕçленĕ май çул-йĕр ăстисене, çак отрасль ветеранĕсене хамăрăн прфесси уявĕ ячĕпе чĕререн саламлатăп. Çулсем малашне те такăр пулччăр.