23 октября 2010 г.
Юн кун пирĕн районта пĕрлĕхлĕ информаци кунĕ иртнĕ. Районти ĕçлĕ ушкăнсемсĕр пуçне, ял çыннисемпе Чăваш Республикин ял хуçалăх министрĕн çумĕ С.П. Димитриев ертсе пыракан ушкăн та тĕл пулнă.
С.П.Димитриев тата район админи-страцийĕн пуçлăхĕн тивĕçĕсене вăхăтлăха пурнăçлакан В.Н.Никифоров Палтиел ял поселенийĕнче пулнă, "Искра" СХПК ĕçченĕсемпе тĕл пулса калаçнă. Ял хуçалăх министрĕн çумĕ йывăрлăхĕсене пăхмасăр выльăх-чĕрлĕх йышне упраса хăвармаллине палăртнă.
"Искра" СХПК ертÿçи М.Х.Хамдеев каланă тăрăх, хуçалăхра ĕне выльăхсен йышне ÿстерме шутлаççĕ.
Кунта 200 вырăнлă ĕне витине реконструкцилес ĕç вĕçленсе пырать. Молокопровод вырнаçтарнă, çĕнĕ холодильник оборудованийĕ туяннă. Патирексем 48 пуç ăратлă çамрăк выльăх туяннă ĕнтĕ, ку ĕç малалла пырать. "Сĕт вăл – куллен кĕрекен укçа. Ĕне усракан çын нихçан та чухăн пурăнмасть", – тенĕ С.П. Димитриев хуçалăх ĕçченĕсемпе сывпуллашнă чух.