Публикации » Ветерансене – çурт-йĕр

23 октября 2010 г.

РАÇÇЕЙ ФЕДЕРАЦИЙĔН Президенчĕ Тăван çĕр-шывăн Аслă вăрçин ветеранĕсене пурăнмалли çурт-йĕрпе тивĕçтересси çинчен кăларнă Указпа килĕшÿллĕн Шăмăршă районĕнче пĕлтĕр вутпа çулăм витĕр тухнă тăхăр паттăрпа çапăçура пуç хунă е каярахпа çĕре кĕнĕ салтак арăмĕсене çурт лартма тата хваттер туянма пысăк пулăшу панă. Кăçал вара тăватă вăрçă инваличĕ пурăнмалли условисене тĕпрен çĕнетрĕ.

Патшалăх малалла та çак çул-йĕртен пăрăнма шутламасть. Нумай пулмасть районти хÿтлĕх пайĕнче социаллă тÿлев илме (36 тăваткал метр лаптăк валли 910800 тенкĕ) 13 сертификат хатĕрленĕ. Ултă çын унпа усă курса Шупашкарпа Канашра тата район центрĕнче хваттерсем илнĕ ĕнтĕ. Ыттисем те тивĕçлĕ хутсем туса пĕтернĕ хыççăн çак çăмăллăхпа усă курĕç.