27 октября 2010 г.
ÇĔНĔ сезона уçса, Шăмăршăри культура аталанăвĕн центрĕнче иртнĕ кĕçнерни кун каçхине пысăк концерт пулчĕ. Концерт программи "Ырă каç пултăр" юрă-ташă композицийĕпе (солисчĕ С.Кудряшов, ташăпа илемлетекенĕ "Антонина" ташă коллективĕ).
Солистсем пĕрин хыççăн тепри сцена çине тухса, юрă хыççăн юрă шăрантарчĕç. Ача-пăча искусство шкулĕнче вĕренекен В.Вернер "Лапу дай", И.Михайлов "Колобок", К.Егорова "Лошадь" юрăсемпе савăнтарчĕç. Вĕсем виççĕшĕ те нумаях пулмасть Шупашкарта иртнĕ "Ылтăн кĕркунне" фестивальте (Пĕтĕм Раççейри мероприяти шайĕнче) лауреат ятне тивĕçнĕ. "Ромашка" ача сачĕн воспитанникĕ В.Хафизова "Грустный дождик", Ача-пăча искусство шкулĕнче вĕренекен М.Константинова "Простая песенка" юрăсемпе килентерчĕç. Е. Воронцова, О. Бибукова, М.Шумилов, С.Кудряшов солистсен юррисене те тулли зал ăшшăн йышăнчĕ. М.Шумиловпа О.Бибукова дуэтпа та хитре юрланине палăртмалла.
Халăх театрĕн артисчĕсем Е.Шамеевапа Л.Григорьева "Макăрма вăхăт çук" инсценировкăна ăста лартса пачĕç. Шăмăршă вăтам шкулĕнчи ача-пăча театрĕ "Чăвашла вĕренмесен" сценка кăтартрĕ.
"Антонина" халăх ташă коллективĕ (илемлĕх ертÿçи А.Нефедова) "Чунга-чанга", "Распрягайте хлопцы кони", украин тата чăваш ташшисене, ачасен кăтартуллă "Фламинго" ташă ансамблĕ (илемлĕх ертÿçи В.Кузьмина) "Про красную шапочку", "Ахаяс" ташăсене кăмăла каймалла илемлĕ ташласа пачĕç.
Концерт программине Н.Милюшкинапа С.Кудряшов ăста, шÿтлĕ диалогсемпе анлăн усă курса (сценари авторĕ В.Львова) ертсе пычĕç.
Концерт ăнăçлă иртрĕ. Куракансем кашни номер хыççăн тăвăллăн алă çупрĕç.