27 октября 2010 г.
АСАНКАССИНЧИ Николай Судуков 2003 çулта Пăчăрлă Пашьелĕнчи вăтам шкултан вĕренсе тухсан Çĕрпÿри ял хуçалăх техникумне вĕренме кĕнĕ. Техник-механик дипломне илсен мал ĕмĕтлĕ çамрăк Чăваш патшалăх ял хуçалăх академийĕнче пĕлÿ пухнă. 2010 çулхи июльте 4 курс пĕтернĕ йĕкĕте çар службине илнĕ. "Аçу пекех маттур салтак пул, командирсене итле, юлташусемпе пĕр чĕлхе тупма тăрăш", – пиллесе янă ăна амăшĕ. "Йĕкĕтсем çар службинче пиçĕхсе чăн-чăн арçынсем пулса тăраççĕ, пĕтĕм йывăрлăха чăтăмлăн чăтса ирттер", - тенĕ ашшĕ.
Ашшĕпе амăшĕ каланине чыслăн пурнăçлать Пенза облаçĕнчи артиллери чаçĕнче службăра тăракан Николай Судуков рядовой. Çакна чаç командирĕ ашшĕпе амăшĕ патне янă Тав çырăвĕ те аван çирĕплетет.
"Хисеплĕ Виталий Николаевичпа Нина Ильинична! – çырать С.Ковалдин подполковник. – Лайăх салтак ÿстерсе çитĕнтернĕшĕн, ăна тивĕçлĕ воспитани панăшăн чаç командованийĕ сире ăшшăн тав тăвать. Николай Судуков подразделенире ĕçченлĕхпе, служба яваплăхĕпе, çирĕп дисциплинăпа палăрса тăрать. Службăри юлташĕсем хушшинче те вăл ырă ятлă. Служба тивĕçĕсене яланах тÿрĕ кăмăлпа, профессилле ăсталăхпа туса пырать сирĕн ывăлăр. Раççей Хĕç-пăшаллă Вăйĕсен ретĕнчи çар хатĕрленĕвĕнчи çитĕнÿсемшĕн ăна командовани темиçе хутчен те тав тунă.
Сире çирĕп сывлăх, ĕçре çитĕнÿ сунатпăр. Ывăлăр çар тивĕçне малашне те кăтартуллăн пурнăçласса шансах тăратпăр".
Кунта çакна та хушса каламалла. Салтак амăшĕ Нина Ильинична 20 çул ытла ĕнтĕ ача садĕнче поварта вăй хурать, ĕçре тăрăшулăх кăтартать. Ашшĕ, Виталий Николаевич, Сĕнтĕрвăрринчи вăрман техникумне пĕтернĕ хыççăн лесничествăра 20 çула яхăн лесник тата мастер пулса ĕçленĕ. Юлашки çулсенче вахта майĕпе Мускав облаçне ĕçлеме çÿрет. Хăйсен ывăлĕ маттур салтак пулса тăни Судуковсене чунтан савăнтарать.