03 ноября 2010 г.
ÇАКНАШКАЛ тĕслĕх темиçе çул каялла Васанта пулнăччĕ. Хальхинче вара Ярăславра пурăнакан Валентина Евгеньевнапа Иван Александрович Тихоновсен çемйине харăсах виçĕ "çĕнĕ кайăк" хутшăннă, пурте – ывăлсем.
Амăшĕпе тĕпренчĕксен сывлăхĕсене шурă халатлисем сăнасах тăраççĕ.
Тихоновсен хĕрĕсен - виççĕри Таньăпа вун виççĕри Снежаннăн савăнăçне вара нимĕнпе те виçеймĕн: пĕр харăсах никамăн та виçĕ шăллĕ пулмасть-çке. Телейлĕ çемье халĕ йĕкĕрешсем валли пикенсех илемлĕ ятсем шырать, вĕсене килте чăтăмсăррăн кĕтет.