10 ноября 2010 г.
РАЙОНТИ шалти ĕçсен пайĕнче дежурнăй чаçри сотрудниксен ĕçĕ чи яваплисенчен пĕри шутланать. Дежурнăй офицерпа унăн помощникĕ пайри тĕрлĕ службăсен ĕç-хĕлне талăк тăрăшшĕпех, пай начальникĕн хушăвĕсемпе килĕшÿллĕн, йĕркелесе пыраççĕ.
Вĕсем çÿлти органсенчен, граждансенчен телефонпа килекен хушусемпе пĕлтерÿсене йышăнаççĕ, вĕсене журнала регистрацилесе тивĕçлĕ мерăсем йышăнаççĕ. Вăл е ку ялта преступлени туни пирки милицие информаци килсенех следствипе оперативлă ушкăна вырăна кăларса ярасси, «Вĕри йĕр» тăрăх кайнă сотрудниксемпе çыхăну тытса тăрасси, кирлĕ пулсан, вĕсене пулăшу парассине йĕркелесси те дежурнăй офицерпа помощникăн тивĕçне кĕреççĕ. Вĕсемех талăкри тата сменăри сотрудниксене хĕç-пăшаллантарса дежурствăна ăсатаççĕ, вĕсен ĕç-хĕлне тĕрĕслесе тăраççĕ. Кунсăр пуçне милицие килекен граждансен пĕлтерÿ-жалобине регистрацилеççĕ, кирлĕ мерăсем йышăнаççĕ. Йĕркелĕхе пăснă е обществăлла вырăнсенче ÿсĕр çапкаланса çÿренĕ, пĕчĕк хулиганла ĕç тунă граждансем пирки те дежурнăй чаçри сотрудниксен протоколсем çырма, тивĕçлĕ мерăсем йышăнма тивет. Паллах, ытти ĕçсем те чылай вĕсен.
Дежурнăй чаçри милиционерсем икĕ талăк урлă службăна çÿреççĕ. Çак материала пичете хатĕрленĕ кун Олег Красновпа Сергей Сергеев дежурствăра тăратчĕç. Вĕсемпе калаçу пуçарсанах Патăрьелĕнчи шалти ĕçсен пайĕнчен конвой службин милиционерĕсем килсе çитрĕç. Кивĕ Чукал лавккине çаратнă арçынна лартса килнĕ иккен вĕсем. Следстви ĕçне малалла тăсса, вырăна следовательпе пĕрле тухса каймалла-мĕн, унта саккуна пăснă çын (вăл айăпа тÿрех йышăннă) кăтартăвне çирĕплетсе протокол çырмалла. Следователь хăйне нумай кĕттермерĕ – автомашина часах çула тухрĕ.
Кун хыççăнах чаçа ГИБДД сотрудникĕсем пĕр ÿсĕр водителе тытса килчĕç. Руль умне ÿсĕр ларнине пула кăçал ăна удостоверенисĕр хăварнă пулнă иккен. Анчах та арçын каллех хăйĕн автомашинин рулĕ умне ларнă, çитменнине – ÿсĕрле. Милици майорĕ О.Краснов çак факта кĕнекере регистрацилерĕ те, протокол çырнă хыççăн милици старшини С.Сергеев ÿсĕр çынна административлă айăпшăн хупакан камерăна кĕртрĕ. Урăлнă хыççăн помощник ăна миравай судья патне илсе каять.
Дежурнăйпа унăн помощникĕ пысăк яваплăхпа ĕçлени тÿрех курăнчĕ. Вĕсем – опытлă сотрудниксем, пайра 16-шар çул ĕçлеççĕ. О.Красновпа С.Сергеева III тата II степень «Службăра палăрнăшăн» медальсемпе наградăланă.