10 ноября 2010 г.
ВЫРĂС ЧУКАЛ ялĕнче пурăнакан Александра Сергеевна Степанова ыран хăйĕн 100 çулхи юбилейне чаплăн паллă тăвать.
Мĕн кăна курман-ши, мĕнле кăна нуша-асапа тÿсмен-ши хăйĕн вăрăм пурнăçĕнче çак паттăр хĕрарăм;
Упăшки Тăван çĕршывăн Аслă вăрçинче вилсен, виçĕ ачине пĕчченех пăхса ÿстернĕ. Ял-йышра хисеплĕ çын пулнă, колхоз ĕçĕнче яланах малта пынă. Вăрçă çулĕсенче хастар ĕçленĕшĕн ăна медальпе наградăланă. Шура аппан "Ĕç ветеранĕ" медаль те пур, Хисеп грамотисем теçеткене яхăн.
100 çулхи юбиляра ултă мăнукĕпе мăнукĕсен вунă ачи савăнăç кÿрсе тăраççĕ. Лида кинĕ те ăна ачана пăхнă пек юратса пăхать.
Çулĕсем нумай пулин те, Шура аппа çивĕч ăс-тăнлă-ха, çитмĕл-сакăр вунă çул каялла пулса иртнĕ ĕçсене те лайăх ас тăвать. Турă панă кашни куншăн савăнса, çамрăксене телей сунса пурăнать ялти хисеплĕ ватă. Эпир ăна тата та нумай пурăнма çирĕп сывлăх сунатпăр.