13 ноября 2010 г.
КАРАПАЙ ШĂМĂРШĂРИ вăтам шкулта вĕренекен Василий Макаров пур предметпа та лайăх ĕлкĕрсе пынă, спорта юратнă. Çар темипе çыхăннă кинофильмсем курма, кĕнекесем вулама килĕштернĕ. Унра çар офицерĕ пулас ĕмĕт çуралнă.
Çутă ĕмĕт патнелле пĕрремĕш утăмсем туса, пысăк конкурс витĕр тухса, 2008 çулта (8 класс пĕтерсен) Василий Ульяновскри суворовецсен çар училищине вĕренме кĕнĕ. Унта та вăл хăйне вĕренÿре, физкультура хатĕрленĕвĕнче лайăх енĕпе кăна кăтартать. Нумаях пулмасть суворовецсем самолет çинчен парашютпа сикнĕ. Палăртнă норматива ăнăçлă пурнăçланăшăн Çĕнĕ Тăрăн яшне "80 лет ВДВ" знакпа наградăланă.
Çак кунсенче Василий Макаров тăван шкулта пулчĕ, учительсем ыйтнипе вĕренекенсемпе, çав шутра кадетсен класĕпе те, тĕл пулу ирттерчĕ. Хăйĕн вĕренĕвĕ, суворовецсен кулленхи пурнăçĕ (унта салтаксен хăш-пĕр кун йĕркисем те кĕреççĕ) питĕ интереслĕ каласа пачĕ формăллă яш. Суворовецсен училищине пĕтерсен хăй çар институтне вĕренме кĕме ĕмĕтленни пирки те пĕлтерчĕ.
Учительсем ăна тăван шкула малашне те тăтăш килсе çÿреме, çакнашкал тĕл пулусене хутшăнма сĕнчĕç. Кун пек мероприятисем вĕренекенсене патриотла воспитани парассинче сисĕмлĕ пулăшу кÿреççĕ.