17 ноября 2010 г.
ПОЧТАЛЬОН ĕçĕ çăмăл мар. Уяр çанталăк-и, çумăр-и е çил - тăман-и – унăн хаçат-журнала, çырусемпе пенси укçине çынсем патне вăхăтра çитермелле, килтен киле çÿресе савăнăç валеçмелле.
Анат Чаткасри çыхăну уйрăмĕнче ертÿçĕсĕр пуçне тата тăватă почтальон вăй хурать. Лариса Анатольевна Самсонова ертÿçĕ пĕлтернĕ тăрăх, хаçат-журнал валеçекенсем – питĕ тăрăшуллă çынсем. Хăйсен ĕçне чунтан юратса пурнăçлаççĕ. Анат Чаткас ялне корреспонденципе тивĕçтерекен Г.Тихонова почтальонра 1987 çултанпа вăй хурать. Галина Николаевна ыттисемшĕн ырă тĕслĕх пулса тăрать. Вăл "Шăмăршă хыпарĕ" хаçата 98 экземпляр çырăнтарнă (почта уйрăмне пурĕ 160 экземпляр килсе тăрать). "Район хаçатне хам та юратса вулатăп", – пытармасть Г.Тихонова. Çавăнпах ĕнтĕ ыттисене те çырăнма хистет.
Пултаруллă та маттур хĕрарăмăн килĕнче те тирпей-илем хуçаланать. Виçĕ ача çуратса ÿстернĕ. Асли çемьеллĕ ĕнтĕ, уйăх каялла Г.Тихонова асанне пулса тăнă. Кĕçĕннисем – хĕрпе ывăл – йĕкĕрешсем, Шупашкарта вĕренеççĕ.
Çавăн пекех çыхăну уйрăмĕн пуçлăхĕ Тури Чаткас ялĕнчи Галина Фадеева, Хĕрлĕ Васан паççулккинчи Валентина Яковлева, Максим Горький паççулккинчи Анатолий Николаев почтальонсен ĕçĕ-хĕлĕпе те кăмăллă. Пурте вĕсем хаçат-журнала ытларах çырăнтарассишĕн тăрăшаççĕ.
Шел те, хальхи вăхăтра кил карти çумне çирĕплетнĕ почта ещĕкĕсем хăшĕсен нимĕнле корреспонденципе те тулмаççĕ. Çакă почта ĕçченĕсене те, хаçат кăларакансене те пăшăрхантарать.