17 ноября 2010 г.
УЧИТЕЛЬ... Чăннипех сăваплă, пысăк пĕлтерĕшлĕ ят. Вĕрентекенсем пирĕншĕн иккĕмĕш атте-анне вырăнĕнчех. Вĕсем ăс панипех пурнăçăн анлă çулĕ çине тухмастпăр-и вара.
Ĕлĕкхипе танлаштарсан, паянхи учительсен ĕçĕ палăрмаллах çăмăлланчĕ. Кашни шкулта тенĕ пекех çĕнĕ технологисем пурнăçа кĕрсе пыраççĕ. Компьютер класĕсем вара тахçан пурнăçланайман ĕмĕтсем пек çеç туйăнатчĕç. Вĕрентÿ системинче Интернет та пысăк пулăшу парать.
Хальхи вĕрентекенсен пĕлÿ шайĕ пысăк пулни те савăнтарать. Учительсем тăрăшмасăр, вăй хумасăр пулман çакă. Чунĕсене парса ĕçлекен учительсем кашни шкултах пулнă, пур та. Сăмахран, З.Безрукова, К.Елисеева, Р.Минеева, Ф.Азизова, С.Хамдеева, Д.Вазанова, Н. Смирнова, М.Ванюшин, З.Левашкина, Р.Садеева, В. Урахова, Г.Никишина, Е.Удочкина педагогсем – çамрăксемшĕн чăннипех ырă тĕслĕх. Педагогика çулĕ çине тăнисене вĕсем хăйсен паха опычĕпе хаваспах паллаштараççĕ. Педагог-ветерансенчен çавăн пекех Н.Павлова, А.Гармонщикова, А. Драгунова, А.Васильевана палăртса хăвармалла.
Малтанах асăнтăмăр: паянхи вĕрентекенсем аслисен пархатарлă ĕçне малалла тăсаççĕ. Вĕсен вĕренекенĕсем районти тата республикăри предметсен олимпиадисенче те мала тухаççĕ. Ку тĕлĕшпе Г.Тридворнова, В.Сарандаевана, Е.Муромцевана, А.Емдиханована, Ю.Ермолаева, В.Семкинана палăртмалла. Р.Ракипова илес пулсан, унăн вĕренекенĕсенчен вун иккĕшĕ республикăри, пĕри Раççейри хими олимпиадисенче çĕнтернĕ.
Районти учительсен династийĕсене илес пулсан, вĕсем вуннă ытла. Филипповсен вăл 257 çула, Гармонщиковсен тата Петровсен 328 çула, Муромцевсен 222 çула, Алексеевсен 255 çула, Шамеевсен 380 çула, Хафизовсемпе Николаевсен 300 çула çитет. Пĕр çемьерен халĕ виçшер учитель шкула васкакансем те пур: Татьяна, Анна, Сергей Хафизовсем, Ирина, Александр, Владимир Еремеевсем, Ирина, Марина, Елена Мулендеевсем...