20 ноября 2010 г.
РАЙОН прокуратури тĕрĕслев ирттернĕ вăхăтра шкулсене медицина работникĕсемпе тивĕçтерменни палăрчĕ. Ку вăл икĕ сăлтавпа çыхăннă. Пĕрремĕшĕнчен, шкулсен штатĕнче медицина ĕçченĕ çук, иккĕмĕшĕнчен, медицина ĕç-хĕлне учреждение кĕртме лицензи илмен.
Хальхи вăхăтра районти шкулсем тата ятарлă лицензиллĕ районти тĕп больница хушшинче медицина пулăшăвĕ парасси пирки килĕшÿ тунă. Шкулсенче кабинетсем те уйăрнă.
СанПин нормативĕсем ыйтнине тивĕçтерменнине пула больница çак кабинетсене хальлĕхе йышăнмасть-ха. Прокуратура тĕрĕслевĕ вăхăтĕнче шкулсем пурте тенĕ пекех медицина кабинечĕсене нормативсемпе килĕшÿллĕн хатĕрлеменни, вĕсенче тивĕçлĕ оборудовани вырнаçтарманни курăнчĕ. Оборудовани туянма укçа-тенкĕ çителĕксĕр уйăрнă.
Акă сăмахран, Палтиелĕнчи вăтам шкулти кабинетра шприцсем, тĕссене уйăрма пĕлнине тĕпчемелли таблица, фильтрлă стерилизаци коробки, ширма çук. Çак çитменлĕхсем кабинета медицина работникĕпе ти-вĕçтерессинче чăрмав кÿрсе тăраççĕ.
Çакнашкал çитменлĕхсене ытти шкулсенче тата ача сачĕсенче те тупса палăртнă. Çавна май шкул директорĕсен тата район администрацийĕн вĕрентÿ пайĕн начальникĕн адресепе представленисем тăратнă. Нормативсене пăхăнса медкабинетсене оборудованипе тивĕçтерме сĕнсе прокуратура Шăмăршă судне 4 иск заявленийĕ тăратнă.
Шăмăршăри вăтам шкулта медицина кабинетне оборудованипе туллин тивĕçтернĕ, анчах та тем сăлтавпа районти тĕп больница медицина пулăшăвĕ памалли килĕшÿ çине алă пусма васкамасть-ха.
Çапла вара, çĕнĕ вĕренÿ çулĕ пуçланнăранпах шкулсенче тата хăш-пĕр ача сачĕсенче медработниксем çук. Çак çитменлĕхсене районта пĕтермеллех.