27 ноября 2010 г.
Кĕвĕ-çемĕ тĕнчине юратакансемшĕн тинех кĕтнĕ вăхăт çитрĕ: ытлари кун Чăваш патшалăх оперăпа балет театрĕнче М.Д.Михайлов ячĕллĕ Пĕтĕм тĕнчери опера фестивалĕ уçăлнă. Çирĕммĕшĕ. Çак саманта çывăхлатма тăрăшакансене ăнланма пулать – классика юрă уявне наци опери "çул" памалла-çке. Чăваш кĕвĕ-çемми вара çак шайри фестивальсенче, шел те, сайра янăрать. Акă ноябрĕн 23-мĕшĕнче асăннă театр сцени çинче Федор Васильевăн шедеврĕ "Шывармань" çĕнĕрен тухнă. Мухтавлă ентешĕмĕре, СССР халăх артистне М.Д.Михайлова сума суса çирĕммĕш хут уçăлакан фестивале ЧР культура министрĕ Роза Лизакова, театрăн тĕп режиссерĕ Максим Жучин ăнăçу суннă. Роза Михайловна Раççей культура министрĕн Александр Авдеевăн салам телеграммипе паллаштарнă. Александр Алексеевич унта Михайлов фестивалĕ Чăваш Еншĕн çеç мар, Раççей культура пурнăçĕшĕн те пĕлтерĕшлĕ пулнине палăртнă.
"Шывармань" оперăпа ЧР Президенчĕ Михаил Игнатьев тата унăн мăшăрĕ Лариса Юрьевна та паллашнă.