08 декабря 2010 г.
«ÇАМРĂКСЕМ – сывă пурнăç йĕркисемшĕн» акцие хутшăнса Палтиел вăтам шкулĕнче тĕрлĕ мероприятисем иртрĕç.
Акă, 11 "А" тата 11 "Б" классенче вĕренекенсен командисем пĕр-пĕринпе юлташла тĕл пулу йĕркелерĕç. Юлташĕсем вĕсене кашни очко хыççăн "Ура" кăшкăрса хавхалантарса пычĕç. Ăмăрту никам çĕнтерейменнипе, командăсем пĕрешкел очко пухнипе вĕçленчĕ.
"Пуçламăш классен эрнинче" тĕрлĕ мероприятисем пулчĕç. Вĕсене ашшĕ-амăшĕ те хутшăнчĕ. Вĕсем ачасен сывлăхне еплерех упраса пурăнмалли, компьютерпа ĕçленĕ, телепередачăсем пăхнă чухне куçсене мĕнлерех майпа сыхласа хăвармалли пирки ырă канашсем илчĕç.
5 "А" класра "Шăнса чирлесен эмелсĕр мĕнле сывалмалла;" ятпа иртнĕ класс сехетĕнче ачасем «Халăх медицининчи» рецептсене сÿтсе яврĕç. Вĕсене пиллĕкмĕшсем, мероприятие хатĕрленсе, нумай пуçтарнă иккен.
Чи интересли вара КВН вăййи пулчĕ. Çак кун Культура керменĕнче 10-11 классенче вĕренекенсен командисем ăмăртрĕç. Вĕсем илемлĕх мелĕсемпе усă курса хăйсемпе паллаштарчĕç, ыттисене саламларĕç, тĕрлĕ ыйтусем çине хуравларĕç, музыка номерĕ кăтартрĕç.
Конкурссен кăтартăвĕсене пĕтĕмлетсен 11 класри яшсен команди вăйлăрах пулни палăрчĕ. Шкул администрацийĕ командăсене интереслĕ вăйăшăн тав турĕ, призсемпе хавхалантарчĕ. "Пĕлÿре – вăй!" КВН вăййине Учитель çулне халалланă.
Хальхи вăхăтра шкул тăрăшсах Çĕнĕ çул уявĕсене хатĕрленет. Бал-маскарад валли костюмсем ăсталаççĕ.