11 декабря 2010 г.
Районти ачасен тата çитĕннĕ çынсен творчество пултарулăхне уçса парас, вĕсен ăсталăхне малалла аталантарас, çитĕнекен ăрăвăн кăмăл-сипет тата илемлĕх туйăмне, тĕнче курăмне анлăлатпа пулăшас тĕллевпе райадминистрацин вĕрентÿ, çамрăксен политики тата культура пайĕ юр кĕлеткесен конкурсне йĕркелет.
«Хĕллехи юмах» конкурс декабрĕн 1–22-мĕшĕсенче иртет. Унăн кăтартăвĕсене декабрĕн 25-мĕшĕнче пĕтĕмлетеççĕ.
Конкурса 2 ÿсĕм категорийĕ – 10 çул таранчченхи ачасем, 16 çул таранчченхи яшсемпе хĕрсем тата аслăраххисем хутшăнаççĕ. Конкурс 3 номинаци тăрăх пулать:
1. Юртан е пăртан тунă скульптура (1 объект пулмалла);
2. Юртан е пăртан тунă композици (2 е ытларах объект);
3. «Юр (пăр) хула».
Çак конкурса районти мĕн пур шкула хутшăнма йыхравлаççĕ. Унта пĕччен те, ушкăнпа та (командăра 5 çынран ытла пулмалла мар) хутшăнма юрать.
Творчество ĕçĕсене жюри пăхса хаклать. Кĕлеткесене пурне те фотоаппаратпа ÿкерсе илеççĕ. Шăмăршăри культура аталанăвĕн центрĕнче юр кĕлеткесен сăн ÿкерчĕкĕсен выставкине йĕркелеççĕ.
«Хĕллехи юмах» конкурс район территорине асамлă сăн кĕртме, илемлетме пулăшасса шанас килет. Çут çанталăкăн кашни тапхăрĕ хăйне евĕр илемлĕ-çке.
Çĕнтерÿçĕсене призсем кĕтеççĕ.