22 декабря 2010 г.
М.Х.Хамдеев, «Искра» СХПК председателĕ, район Пухăвĕн депутачĕ:
– Чăваш Ен Президенчĕ М.В. Игнатьев Патшалăх Канашне янă Çырура питĕ пысăк пĕлтерĕшлĕ ыйтусене çĕклерĕ. Çырăва хам енчен лайăх хак паратăп, вăл районта пурăнакансен чун-чĕринче те тарăн йĕр хăварать пулĕ тесе шутлатăп.
Президент ял хуçалăх ĕçченĕсем пирки ырă сăмахсем калани савăнтарать.
"Йывăрлăхсене пăхмасăр эсир кăмăл çирĕплĕхне сыхласа хăвартăр, уншăн сире чунтан тав тăватăп", – терĕ Президент.
Çырура ял халăхне ĕçпе тивĕçтерес, ял хуçалăхне çĕнĕ техникăпа пуянлатас, экологи лару-тăрăвне лайăхлатас ыйтусене те çĕкленĕ. Экологи тĕлĕшĕнчен таса апат-çимĕç туса илес тĕллевпе çĕр ĕçĕнче органикăпа вырăнлă усă курассине шута илекен биологилизаци мелĕсен пĕлтерĕшĕ ÿссех пынине палăртнă. Пирĕн малашне халăх валли биологи тĕлĕшĕнчен хăрушсăр, таса апат-çимĕç çеç туса илме тытăнмалла. Пурнăç çапла ыйтать.
С.Л. Сорокина, Палтиел вăтам шкулĕнчи физкультура учителĕ:
– Çырура республикăра физкультурăпа спорта аталантарас ыйтăва уйрăммăн çĕклени хавхалантарчĕ. Пурте спортсмен пулаймĕ, анчах сывă пурнăç йĕркине мала кăларни обществăшăн питĕ пĕлтерĕшлĕ.
С.В.КУДРЯШОВ, Пăчăрлă Пашьелĕнчи пĕтĕмĕшле врач практикин офисĕн ертÿçи:
– "Чăваш Енĕн вăйĕ унăн çыннисенче, наци сывлăхĕ вара эпир ачасем çине мĕнле пăхнинчен килет", – тенĕ М.В. Игнатьев Патшалăх Канашне янă Çырура. Çак сăмахсемпе эпĕ пĕтĕмпех килĕшетĕп.