22 декабря 2010 г.
Çамрăксен командисен Учитель çулне халалланă КВН вăййисем Анат Чаткас тата Пăчăрлă Пашьел зонисенче питĕ интереслĕ иртнĕччĕ.
Çак кунсенче вара Шăмăршăри культура аталанăвĕн центрĕнче шкулсенчи пултаруллă командăсем – Кивĕ Чукалти "Адреналин" (руководителĕ Л.И. Денисова), Пăчăрлă Пашьелĕнчи "Асăрханăр, вĕри шыв!" (Э.С. Можаева), Карапай Шăмăршăри "Канăçсăр çынсем" (И.Г.Яковлева), Палтиелĕнчи "Бэта" (С.Р. Сандркина), Шăмăршăри "Пире ăнланаймăр" (В.В. Хорькова) тата КВиН (Е.С.Воронцова) командăсем, районти тĕп больницăри "Васкавлă пулăшу" (И.В. Новоселова) команда финалти вăйăсенче вăй виçрĕç.
Командăсем малтанах "Эпир – шкултан тухнă ăрусем" конкурсра ăмăртрĕç, илемлĕх мелĕсемпе усă курса хăйсемпе паллаштарчĕç. Малалла вара вĕсем "Парта хушшинчи репортаж" конкурсра шкулти шÿтлĕ-пăтăрмахлă самантсене электронлă технологисемпе усă курса, сцена çинче выляса кăтартрĕç. Юлашкинчен "Шкул тапхăрĕ" музыка конкурсĕнче тупăшрĕç.
Жюри ăмăртăва пĕтĕмлетсен Шăмăршă вăтам шкулĕнчи "Пире ăнланаймăр" тата "КВиН" командăсем пĕрешкел бал пухса пĕрремĕш вырăна тухни палăрчĕ. Районти тĕп больницăн "Васкавлă пулăшу" команди иккĕмĕш вырăна тухрĕ. Кивĕ Чукалти тĕп шкулти "Адреналин" тата Палтиелĕнчи вăтам шкулти "Бэта" командăсем виççĕмĕш вырăн йышăнчĕç.
"Пĕлÿре - вăй!" ятпа иртнĕ КВН вăййисен чи пултаруллă участникĕсене те палăртрĕ жюри. Çак хисеплĕ ята Илья Зайцевпа ("Бэта") Максим Мандрюков ("Адреналин") тивĕçрĕç.
Райадминистрацин вĕрентÿ, çамрăксен политики тата культура пайĕн начальникĕн çумĕ А.П. Чумуркина КВН вăййисене хутшăннă командăсене Грамотăсемпе призсем парса чысларĕ.
Юлашки çулсенче районта КВН вăййисем вăй илсе пыни савăнтарать.