25 декабря 2010 г.
Пирĕн ентешсем Тăван çĕр-шывăн тĕрлĕ регионĕсенче ĕçлесе пурăнаççĕ. Чылайăшĕ тĕпленнĕ вырăнта çемье çавăрнă, ача-пăча çуратса ÿстернĕ, пархатарлă ĕçпе ят-сума тивĕçнĕ.
Çакнашкал çынсенчен пĕри – Пуянкассинче çуралса ÿснĕ М.К. Андронова. Мария Кирилловна, агроном-садовод дипломне илнĕскер, çамрăк чухне Брянск облаçĕнчи "Локоть" рабочи паççулккинче тĕпленнĕ. Вăл унти совхозра агроном-садоводра ĕçленĕ, Виктор Скворцовпа пĕр çемьене пĕрлешнĕ. Туслă çемьере хĕрпе ывăл çуралнă. Ачисем - Александрпа Елена – пĕчĕкренех музыка патнелле туртăннă, ÿнер шкулĕнче кĕвĕ ăсталăхне туптанă. Паллах, ку ăнсăртран пулман: Мария Кирилловнан куккăшĕ купăс ăста каланипе таврара палăрса тăнă, мăшăрĕ те, Виктор, пултаруллă баянист-купăсçă пулнă.
Александрпа Елена хăйсен пурнăçне музыкăпа çыхăнтарнă. Вăтам шкул пĕтерсен вĕсем малтан Курскри музыка училищинче пĕлÿ пухнă, кайран Орелти искусствăпа культура инситутĕнчен вĕренсе тухнă. Александр – баянпа, Елена фортепианопа калас ăсталăха алла илнĕ. Вĕсем иккĕшĕ те хăйсем вĕреннĕ искусство шкулĕнче преподавательте ĕçлеççĕ, музыкантсен тĕрлĕ конкурсĕсене хутшăнса çĕнтерÿçĕ ятне тивĕçеççĕ. Ку, паллах, ашшĕпе амăшне чунтанах савăнтарать (вĕсем халĕ иккĕшĕ те пенсире ĕнтĕ).
Баянист ăсталăхĕ енĕпе Александр Викторович Раççейри чи пултаруллă музыкантсен йышĕнче тăрать. Талантлă баянист – облаçсем хушшинчи тата Пĕтĕм Раççейри нумай конкурссен лауреачĕ. Вăл - Халăхсем хушшинчи (Международный) Пиллĕкмĕш "Филантроп" конкурсăн "Инструментпа каласси" номинацийĕн çĕнтерÿçи (унта 9 çĕр-шывран килнĕ 1300 музыкант хутшăннă).
Пирĕн ентешĕмĕрĕн ывăлĕ нумаях пулмасть Киев хулинчен каллех пысăк çĕнтерÿпе таврăннă. А.В. Скворцов – Андронов унта баянистсен Пĕтĕм тĕнчери конкурсĕнче вăй виçнĕ. Европăри чылай патшалăхран, Иранран, Китайран килнĕ баянистсем хушшинче Александр Викторович пĕрремĕш вырăн çĕнсе илнĕ, сумлă Дипломпа премие тивĕçнĕ.
Талантлă музыкант хăйĕн амăшĕн çуралнă кĕтесне те манмасть. А.В. Скворцов – Андронов нумаях пулмасть Пуянкассине килсен пуян программăллă концертпа савăнтарчĕ.
Ентешĕмĕрĕн ывăлне илемлĕ пултарулăхра малашне те ăнăçу сунатпăр.