01 января 2011 г.
КАМРАН кăна салам сăмахĕ илтмерĕç-ши 2010 çулхи октябрĕн 27-мĕшĕнченпе – çут тĕнчене харăсах виçĕ пăхаттир – Ярослав, Владислав тата Станислав килнĕренпе - Ярăславра пурăнакан Иванпа Валентина Тихоновсем;
Çĕнĕ çул уявĕ умĕн вара телейлĕ ашшĕпе амăшĕ хăйсен ачисемпе Шăмăршăри Мăшăрлану керменĕнче пулчĕç, кунта Ярославпа Владислава тата Станислава чаплă лару-тăрура регистрацилерĕç. Çак савăнăçлă мероприятие Чăваш Республикин культура, наци хутшăнăвĕсен, иформаци политики тата архив ĕçĕсен министрĕ Р.М. Лизакова тата Республикăри Халăх пултаруллăхĕн çурчĕн директорĕ В.С.Бондарев ятарласах килнĕ. Сăлтавĕ те пур: телейлĕ мăшăр ялти тата районти культура пурнăçне хастар хутшăнать, Тихоновсен çемье ансамблĕн ырă ячĕ Шупашкар таранах сарăлнă.
Р.М. Лизакова Ярославăн, Владиславăн тата Станиславăн ашшĕпе амăшне ача çуралнине çирĕплетекен 162-мĕш, 163-мĕш тата 164-мĕш номерлĕ свидетельствăсем, хаклă парне пачĕ.
"Телейлĕ, çирĕп сывлăхлă çитĕнĕр, салтака юрăхлă пулăр", - пехиллерĕ Роза Михайловна хальлĕхе кипке ăшĕнче выртакан пĕчĕк пăхаттирсене.
Тав сăмахĕсемпе хаклă парнесем татах та нумай пулчĕç çак кун. Çĕнĕ çула çĕнĕ телейпе (пĕр телей çеç мар - виççĕ харăс!) кĕрекен Иванпа Валентина Тихоновсем уява килнисене илемлĕ чăваш юррипе саламларĕç.