01 января 2011 г.
2010 çул - Вĕрентекен çулталăкĕ. Мĕнпе асра юлчĕ-ши вăл вĕрентекен чĕринче, епле паллă йĕр хăварчĕ-ши; Сăмахăм - Палтиелĕнчи вăтам шкулта чăваш чĕлхипе литературине вĕрентекен, 11-мĕш класс руководителĕ Зинаида Ивановна Свеклова çинчен.
Вăл Анат Чаткас ялĕнче çуралса ÿснĕ. Мĕн пĕчĕкрен Зина вĕрентекен пулас ĕмĕтпе çунатланнă. Анат Чаткасри вăтам шкула лайăх паллăсемпе вĕренсе пĕтерсен 1981 çулта И.Н. Ульянов ячĕллĕ Чăваш патшалăх университечĕн историпе филологи факультетне, чăваш чĕлхипе литератури уйрăмне вĕренме кĕрет. Çав вăхăтрах журналистика енĕпе те пĕлÿ пухать. 1986 çулта çамрăк хĕрĕн ĕмĕтленнĕ ĕмĕчĕ пурнăçа кĕрет. Аллине Диплом илнĕ çамрăк вĕрентекен Палтиелĕнчи вăтам шкулта ĕçлеме пуçлать. Кăмăллăн, ырă сунса кĕтсе илет ăна шкул коллектвĕ.
Ĕçне юратса, кашни урока методика енĕпе тĕплĕн хатĕрленсе ачасене тарăн пĕлÿ парассишĕн тăрăшать вăл. Зинаида Ивановна "Çивĕч перо" кружок йĕркелерĕ. Çак кружок мĕнлерех усă панине малашлăх кăтартрĕ. Вун-вун вĕренекен çак кружок урлă хăйĕн пĕлĕвне ÿстерчĕ.
Шкулта, районта, республикăра ирттерекен олимпиадăсемпе конкурссенче Зинаида Ивановнăн вĕренекенĕсем яланах малти вырăнсенче.
Вĕрентекене тата вăл пĕлÿ паракан предмета чунтан юратнине, хисепленине çак тĕслĕх те каламасть-и-ха; Зинаида Ивановнăн вĕренекенĕсем Елена Краснова, Александр Родионов, Алена Савельева, Алина Паймина, Татьяна Паймина, Алина Юманова хăйсен пурнăçне тăван чĕлхепе çыхăнтарчĕç. Юратнă хĕрĕ Надежда Свеклова та амăшĕн профессине суйласа илчĕ.
Зинаида Ивановна виççĕмĕш çул чăваш чĕлхипе литературине вĕрентекенсен ассоциацийĕн председателĕ. Çак ĕçре те нумай çĕнĕлĕх. Хамăр районти шкулсене тухса çÿренисĕр пуçне ассоциаци членĕсем Патăрьел, Елчĕк районĕсенчи ĕçтешĕсемпе ĕçлĕ çыхăну йĕркеленĕ. Уçă уроксем, класс тулашĕнчи мероприятисем ирттерес енĕпе ĕç опычĕпе паллашаççĕ.
Вĕрентекен хăйĕн тавра курăмне ÿстермесĕр, кашни кун çĕнĕлĕхе алла илмесĕр хальхи вăхăтра тулли пĕлÿллĕ специалист пулаймасть. Çакна шута илсе Зинаида Ивановна ырми-канми тăрăшать. Килте, компьютер умĕнче нумай вăхăт ирттерет. Республикăри "Халăх шкулĕ" журналта методика статйисем пичетлет, хăйĕн опычĕпе паллаштарать. Зинаида Ивановна районти "Шăмăршă хыпарĕ", республикăри "Хыпар" хаçатсемпе те туслă. 2003 çулта унăн "Чĕре сасси" ятпа очерксемпе сăвăсен кĕнеки пичетленсе тухрĕ.
Зинаида Ивановна обществăлла ĕçре те хастар: концерт, илемлĕ вулакансен конкурсĕ, чăвашлăхпа çыхăннă уяв, тĕрлĕрен доклад, ашшĕ-амăшĕсен пухăвĕ тата ытти мероприятисене хутшăнса пуçаруллăх кăтартать.
2010 çул вара Зинаида Ивановнăшăн чăннипех те тухăçлă çул пулчĕ. Вĕрентекен çулĕ унăн пурнăçĕнче чăннипех çутă та паллă, ĕмĕр асăнмалăх йĕр хăварчĕ. Ял халăхĕ ăна пĕр саслă пулса Палтиел ял поселенийĕн депутачĕ пулма суйларĕ. Вăл Чăваш Республикин Президенчĕн грантне çĕнсе илчĕ, "Чăваш Республикин тава тивĕçлĕ учителĕ" ята илме тивĕçлĕ пулчĕ.
Палтиелĕнчи вăтам шкулта çакăн пек маттур та пултаруллă вĕрентекен пурри – ачасемшĕн, ашшĕ-амăшĕшĕн, уйрăмах педагогика коллективĕшĕн пысăк чыс.