02 февраля 2011 г.
Карапай Шăмăршăри вăтам шкулта оборонăпа массăлă ĕçсен уйăхлăхĕн тапхăрĕнче патриотикăлла тĕрлĕ мероприятисем иртеççĕ. Акă Ленинград блокадине татнăранпа 67 çул çитнине халалласа актовăй залра "Лениград хÿтĕлевçисен манăçми паттăрлăхĕ" ятпа интереслĕ мероприяти пулчĕ.
Мероприяти шкул директорĕ Ю.Ф. Ермолаев хатĕрленĕ "Раççей патшалăхĕн мухтавлă çĕнтерĕвĕсем" электронлă презентаципе уçăлчĕ. Учительсем тата вĕренекенсем Александр Невскийпе Дмитрий Донской, Александр Суворовпа Михаил Кутузов та ытти полководецсен çарĕсен нихçан манăçми çĕнтерĕвĕсене çутатакан, халăхăн Аслă Отечественнăй вăрçăн тĕрлĕ тапхăрĕнчи, çав шутра Лениграда хÿтĕленĕ салтаксемпе офицерсен паттăрлăхне кăтартакан материалсемпе кăсăкланса паллашрĕç.
Ленинграда хÿтĕлесе юлашки сывлăш тухиччен оборонăра тăнă чухне, çак мухтавлă хулан 900 куна пынă блокадин ункине татнă вăхăтра паттăрсен вилĕмĕпе пуç хунă салтаксемпе офицерсене асăнса пĕр минут шăп тăнă хыççăн залра ларакансем Д.Шостакович композиторăн Ленинград блокадинче кĕвĕленĕ "Çиччĕмĕш симфонине" итлерĕç. 6-11 классенче вĕренекенсем, В.И. Сельцова учительница ертсе пынипе, "Манмастпăр сире, Ленинград паттăрĕсем!" литературăпа музыка композицийĕ кăтартрĕç.
Мероприятие вĕçлесе, 6 класра вĕренекен Александра Измайлова "Баллада о красках" юрра чун хумханмалла юрласа пачĕ.