05 февраля 2011 г.
Шăмăршă районĕнче спорта юратакансем нумаййăн пурăнаççĕ. Вĕсем спортăн тĕрлĕ тĕсĕсемпе интересленеççĕ, ăмăртусене хутшăнаççĕ. Карапай Шăмăршăра çуралса ÿснĕ Владимир Кузьмин та спорт ăмăртăвĕсемпе вăййисенчен пăрăнса юлман. Уйрăмах хоккейла выляма юратнă вăл. Шел, анчах унăн пурнăçĕ ытла та кĕске пулчĕ, вăл сарăмсăр вилчĕ. Ăна асăнса халĕ районта хоккей турнирĕ ирттерме пуçларĕç. Кăçал В.Кузьмин ячĕллĕ Кубока çĕнсе илессишĕн Патăрьел, Комсомольски тата Шăмăршă районĕсен командисем тупăшрĕç. Вăйăсем питĕ хĕрÿ те интереслĕ иртрĕç.
Шăмăршăсем Кубок хуçисем пулса тăчĕç. Иккĕмĕш вырăн комсомольскисене тивĕçрĕ. Патăрьелсем виççĕмĕш вырăнпа çырлахрĕç. Чи лайăх вылякансене те палăртрĕç: А.Казаков (Патăрьел) вратарь, А.Самарин (Комсомольски) тапăнса вылякан, С.Хафизов (Шăмăршă) – хÿтĕлевçĕ.
Çак турнира ирттерме спонсор пулăшăвĕ панă В.Кузьмина, Е.Кузьмина, Э. Смаева, С.Сергеева, Ю.Столярова, районти милицин ГИБДД уйрăмне, М.Самсонова, Ю.Карпова, И.Сабаева, С.Галкина судьясен коллегийĕ чĕререн тав тăвать. Çавăн пекех вăйăсен комментаторне Г.Смаева ырăпа асăнса хăвармалла. Радио редакторĕнче ĕçленĕскер, вăйăсене лайăх комментари парса тăчĕ. Районти Культура çуртĕнче ĕçлекен М.Шумилов музыка аппаратурипе тивĕçтерчĕ.