09 февраля 2011 г.
ÇАК кунсенче Чехири Новое Место хулинче юниорсемпе çамрăксем хушшинче биатлонистсен тĕнчери ăмăртăвĕ пулса иртнĕ. Раççей пĕрлештернĕ командин йышĕнче Васанта çуралса ÿснĕ Виктор Якушовăн ывăлĕ Коля çак пысăк пĕлтерĕшлĕ ăмăртăва хутшăннă. Çивĕч кĕрешÿре 20 çулти чăваш каччи чемпионатăн бронза тата кĕмĕл медалĕсен призерĕ пулса тăнă.
Йĕлтĕрпе хăвăрт чупса тата пăшалпа тĕл персе, Коля тăватă енлĕ ăмăртусенче палăрмаллах çитĕнÿсем тунă. 80 биатлонистран малтанхи ăмăртура 13-мĕш, иккĕмĕшĕнче 8-мĕш вырăнсене йышăннă.
Уйрăммăн ăмăртнă çĕрте виççĕмĕш вырăна тухса, кĕмĕл медале тивĕçет. Çак ăмăртурах Раççей командинчи Александр Печенкин, Иван Крюковпа Дмитрий Дюжев спортсменсем кĕмĕл медале çĕнсе илеççĕ.
Февралĕн 5-мĕшĕнче çак тăватă биатлонист 4х7,5 километрлă эстафета ăмăртăвĕнче Германи спортсменĕсем хыççăн иккĕмĕш вырăна тухаççĕ. Каллех кĕмĕл медаль! Виççĕмĕш вырăнта – Норвеги команди.
Коля Украинăра çуралнă. Ашшĕ, Тинĕс-Çар флотĕнче хĕсметре пулнă хыççăн, Одессăри пединститутран вĕренсе тухать. Паллă футболист Николаевск хулинче ĕçлет. Амăшĕ вара – байдаркăпа ишессипе Украина чемпионки.
1997 çулта вĕсен çемйи Шупашкара куçса килет. Ашшĕ-амăшĕ ал-ура çавăриччен Коля Васанта аслашшĕ килĕнче пурăнать. 2 çул кунти шкулта вĕренет. Хальхи вăхăтра вăл – Уфари патшалăх университетĕнчи истори факультечĕн 3-мĕш курс студенчĕ.
Кольăн тĕп тĕллевĕ: 2014 çулта Сочире иртекен хĕллехи Олимпиадăна хутшăнса пысăк çитĕнÿ тăвасси. Ăнăçу сунатпăр сана, Николай!