12 февраля 2011 г.
РАÇÇЕЙРИ Космонавтика çулне халалласа, райадминистраци пуçлăхĕн йышăнăвĕпе килĕшÿллĕн, кăçал февраль-апрель уйăхĕсенче культура учрежденийĕсен илемлĕ пултарулăх коллективĕсен районти фестивалĕ иртет. Унăн тĕллевĕсемпе задачисем:
- районти халăхăн художество пултарулăхне упраса хăварасси, ăна малалла аталантарасси;
- халăхăн мĕн пур категорийĕсене, ачасене, çамрăк ăрăва культура ĕç-хĕлне активлă явăçтарасси;
- халăхăн культурине, йăли-йĕркине çамрăксене вĕрентесси;
- пултаруллă ачасене, çĕнĕ талантсене тупса палăртасси, вĕсене хăйсене сцена çинче туллин кăтартма пулăшасси;
- ял çыннисен декораципе ал ĕç пултарулăхне чĕртсе тăратасси, упраса пурăнасси, аталану çул-йĕрĕпе илсе пырасси. (Концерт программине кăтартнипе пĕрлех ял поселенийĕсен «Çемье мастерскойĕ» курав та йĕркелемелле).
Фестивале районти культура учрежденийĕсен пур коллективĕ те хутшăнать, 1 сехет те 20 минута тăсăлакан концерт кăтартать тата декораципе ал ĕç ăсталăхĕн «Çемье мастерскойĕ» выставка йĕркелет.
Районти фестиваль 3 тапхăрпа иртет. Пĕрремĕш тапхăрта илемлĕ пултарулăх коллективĕсем хăйсен ялĕсенчи культура учрежденийĕнче халăха смотр-отчет программипе паллаштараççĕ. Иккĕмĕш тапхăрта чи лайăх коллективсемпе уйрăм солистсем Шăмăршăри культура аталанăвĕн центрĕнче иртекен гала-концерта хутшăнаççĕ. Чи ăнăçлă художество номерĕсене районти ĕçпе юрă тата спорт уявĕнче – «Акатуйра» кăтартаççĕ.
Коллективсен программинче хор (икĕ произведени), вокал ансамблĕсен (хĕрарăмсен, арçынсен тата хутăш), уйрăм солистсен (дуэт, трио), çемье ансамблĕн юррисем, инструментсен ансамблĕн произведенийĕсем, художество сăмахĕ, театр жанрĕ, фольклор юрри-ташши тата ташăсем (халăх, эстрада) пулмалла. Çав кунах çÿлерех асăннă «Çемье мастерскойĕ» курав та ирттермелле.
Жюри концерт программине фестиваль тематикипе шайлашуллă тăнине, артистизмпа пултарулăхне, професси шайне, сцена культурине пăхса хакласа çĕнтерÿçĕсене палăртать. Çĕнтерÿçĕсене Дипломсемпе тата хаклă призсемпе чыслаççĕ.
Район çыннисене культура учрежденийĕсен илемлĕ пултарулăх коллективĕсен концерчĕсемпе выставкăсем йĕркелемелли графикпа та паллаштаратпăр. Февралĕн 11-мĕшĕнче – Пуянкасси, 18-мĕшĕнче – Карапай Шăмăршă, 24-мĕшĕнче – Палтиел, мартăн 2-мĕшĕнче – Кивĕ Чукал, 11-мĕшĕнче – Шăмăршă, 18-мĕшĕнче – Анат Чаткас, 22-мĕшĕнче – Чукал, 25-мĕшĕнче – Пăчăрлă Пашьел, апрелĕн 4-мĕшĕнче Васан ял поселенийĕсен концерчĕсемпе «Çемье мастерскойĕ» выставкисем иртеççĕ. Гала-концерт апрелĕн 15-мĕшĕнче пулать.
Район çыннисене ялсенчи художество коллективĕсен смотр-отчечĕсен программисене курма, сцена тата ал ĕç ăстисен пултарулăхĕпе паллашма сĕнетпĕр.