19 февраля 2011 г.
Республикăри районсем халĕ пĕлтĕрхи ĕç кăтартăвĕсене тишкереççĕ, 2011 çул валли çĕнĕ тĕллевсем палăртаççĕ. Юн кун Шăмăршă район администрацийĕнче те анлă канашлу пулчĕ, унта районти пур шайри ертÿçĕсем те хутшăнчĕç. Канашлу ĕçне Чăваш Республикинчи халăха ĕçпе тивĕçтерекен патшалăх службин ертÿçи С.П. Димитриев хутшăнчĕ.
Иртсе кайнă çулталăкра экономика тата районăн социаллă пурнăçĕ мĕнле аталаннине маларах депутатсемпе ертÿçĕсен канашлăвĕнче тĕплĕн тишкерсе тухнăччĕ пулин те, район администрацийĕн пуçлăхĕ В.П. Фадеев хăйĕн хальхи докладне тата та анлăлатни, тĕслĕхсемпе пуянлатни, ĕç-хĕле критикăлла хак пама тăрăшни курăнчĕ. Валерий Петрович ял хуçалăхĕпе промышленноç, пĕчĕк предпринимательлĕх, потребительсен рынокĕ, пурăнмалли çурт-йĕр строительствипе коммуналлă хуçалăх мĕнле аталаннипе, муниципалитетăн тĕллевлĕ пограммисем мĕнле пурнăçланса пынипе паллаштарчĕ, 2011 çул валли конкретлă задачăсем лартрĕ. Уйрăммăн илсен, ял хуçалăхĕнче выльăх-чĕрлĕх фермисене çĕнетсе реконструкцилес, хальхи вăхăтри технологипе пуянлатас тĕлĕшпе пысăк ĕç тумалла. "Восход" СХПКра 120 вырăнлă, "Шанс" ОООра 200 вырăнлă, "Сатеев А.И." фермер хуçалăхĕнче 200 вырăнлă, "Исток" ОООра 200 вырăнлă ĕне выльăх витисене хута ямалла.
Промышленноçа илес пулсан, йывăçран çĕнĕ изделисем туса кăларакан производствăн инвестици проекчĕсене ĕçе кĕртмелле, "Шăмăршăри бизнес-инкубатор" автономлă коммерциллĕ мар организацире хура тул кĕрпине пакетсемпе кăларассине хута ямалла, ялсенчи çĕнĕ урамсене электричество кĕртессине вĕçлемелле, халăха ĕçмелли паха шывпа туллин тивĕçтерме тытăнмалла.
Канашлура Чăваш Республикинчи халăха ĕçпе тивĕçтерекен патшалăх службин ертÿçи С.П. Димитриев сăмах илсе çапла каларĕ: Шăмăршăсен лайăхрах ĕçлеме пĕтĕм майсем пур. Чăнах та, çивĕч ыйтусене самантрах татса пама йывăр. Çавăнпа та ку ĕçе тапхăрăн-тапхăрăн, алла-аллăн тата чăн-чăн профессионалсен шайĕнче вăй хурса пурнăçламалла.
Республика представителĕ районти суту-илÿ точкисенче социаллă пĕлтерĕшлĕ хăш-пĕр апат-çимĕç хакĕсем пысăкки пирки асăрхаттарчĕ, çăкăр хакĕ тĕлĕшпе уйрăммăн каларĕ. Патшалăхăн пулăшу ĕçĕсемпе интернет ресурсĕсем урлă усă курмалли майсене анлăлатасси пирки те сăмах хускатрĕ. Уççăн ĕçлекен бизнеса, çавăн пекех муниципалитет хыснипе тухăçлă усă куракан бюджет учрежденийĕсене тав турĕ.
"Районăн кăçал кризисченхи 2008 çулхи кăтартусенчен иртме мĕн пур майсем пур. Лару-тăру ырă енне улшăнасса, район Чăваш Ен ăнăçăвне хăйĕн тÿпине хывасса çирĕп шанатăп", – терĕ С.П. Димитриев.
Çак кунах С.П. Димитриев район администрацийĕнче граждансене харпăр-хăй ыйтăвĕсемпе йышăнчĕ.