19 февраля 2011 г.
ФЕВРАЛĔН 26-мĕшĕнче, шăмат кун, Шăмăршăри культура аталанăвĕн центрĕнче Шăмăршă, Патăрьел, Елчĕк тата Комсомольски районĕсенчи театр коллективĕсен тата илемлĕ вулакансен фестиваль-конкурсĕ иртет. "Яланах театр" ятпа йĕркелекен республика шайĕнчи çак мероприятие çитĕннисем те, ачасем те хутшăнаççĕ.
Фестиваль-конкурсăн тĕллевĕсем:
– театр коллективĕсен тĕрлĕ енĕсемпе тата илемлĕх паллисемпе паллашасси, паха опыта сарасси;
– коллективсем хушшинчи творчествăлла çыхăнусене çирĕплетесси;
– çĕнĕ талантсене тупса палăртасси;
–репертуарăн илемлĕх шайне ÿстересси;
– вырăс, чăваш, тутар, ирçе тата ытти халăхсен классикăлла тата хальхи поэзипе прозине пропагандăласси;
- хамăр тăрăхри тĕрлĕ халăхсен литературипе, культурипе тата йăли-йĕркипе паллаштарасси;
– художество сăмахĕн пĕлтерĕшне ÿстересси;
– конкурса хутшăнакансен актер ăсталăхне кăтартасси;
Конкурс программинче пĕр актлă постановкăсем, спектакль сыпăкĕсем пулаççĕ. Конкурс материалĕсен тата уйрăм номерсен темине коллективсем хăйсем суйласа илеççĕ.
Фестиваль-конкурс çĕнтерÿçисене жюри çак номинацисем тăрăх палăртать:
– "Чи лайăх коллектив" (çитĕннисен тата ачасен коллективĕсене уйрăммăн пăхса хаклаççĕ);
– "Чи лайăх артист" (çитĕннисем, ачасем хушшинче);
– "Чи лайăх дебют" (çитĕннисен, ачасен);
– "Чи лайăх режиссер ĕçĕ";
– "Спектакле музыка тĕлĕшпе ăнăçлă илемлетекен";
– "Чи лайăх сцена костюмĕсем";
– "Чи лайăх декорацисем".
Кунсăр пуçне сăвă тата проза сыпăкне вулакансен конкурсĕ те пулать (ачасемпе çитĕннисем хушшинче, çĕнтерÿçĕсене уйрăммăн палăртаççĕ).
Театр коллективĕсен сцена çинче 15 минутран ытла пулмалла мар.
Февралĕн 26-мĕшĕнче район çыннисене Шăмăршăри культура аталанăвĕн центрне килме, хамăр районти тата кÿршĕллĕ районсенчи театр коллективĕсен, илемлĕ вулакансен пултарулăхĕпе паллашма сĕнетпĕр. "Яланах театр" фестиваль-конкурс кăнтăрла 12 сехетре пуçланать.