22 февраля 2011 г.
ШĂМĂРШĂ вăтам шкулĕнчи 7-мĕш класра вĕренекенсем "Манăн ĕмĕт" темăпа сочинени çырнă. Энтĕрьелĕнчи Сергей Гордеев хăйĕн хайлавне çапла пуçланă: "Тăван çĕр-шыв хÿтĕлевçисен профессийĕ мĕн авалтан чи сумлисенчен пĕри пулнă. Вăтам шкул пĕтерсен эпĕ çар училищине вĕренме кĕме, офицер пулма ĕмĕтленетĕп..."
Арçын ачан çак сочиненийĕнче шăрçаланнă йĕркесем пушă сăмахсем пулман. Сергей вĕренÿре лайăх паллăсемпе ĕлкĕрсе пынă, ÿт-пĕвне спортпа пиçĕхтернĕ. 10-мĕш класра вĕреннĕ вăхăтра вара пулас çар специальноçне те палăртса хунă: "Аттестат илсен Екатеринбургри артиллери аслă çар училищине вĕренме кĕме документсем тăрататăп..."
1992 çулта вăтам шкул пĕтерсен Сергей училищĕрен чĕнÿ хучĕ килессе чăтăмсăррăн кĕтнĕ, экзаменсене тĕплĕн хатĕрленнĕ. Чĕнÿ хутне илсенех вара Екатеринбурга çул тытнă.
Училищĕне кĕмелли пĕр вырăншăн 5-6 çамрăк кĕрешнĕ. Анчах та Энтĕрьел каччи вырăс чĕлхипе тата литературăпа сочинение лайăх çырса, математикăпа, физикăпа çирĕп пĕлÿ кăтартса, физкультура çар хатĕрленĕвĕн нормативĕсене ăнăçлă пурнăçласа курсантсен йышне кĕнĕ.
Училищĕре пĕтĕмĕшле пĕлÿ паракан предметсемпе çар хатĕрленĕвĕн тата командир ăсталăхĕн дисциплинисем пĕр-пĕринпе ылмашăнса пынă май, 4 çул сисĕнмесĕрех хыçа юлнă. 1996 çулта Сергей Гордеев вĕренÿ ротинчи ытти юлташĕсемпе пĕрле курсант пакунне лейтенантăннипе ылмаштарнă. Çамрăк выпускникăн офицер биографийĕ Мускав çар округĕнче пуçланнă, вăл Тулăри Сывлăш--Десант çарĕсен дивизийĕнче артиллери взводне йышăннă. Тепĕр çултан вара Ульяновскри бригадăра взвод командирĕн тивĕçне пурнăçланă.
Çак чаçра та Сергей Гордеев лейтенант служба ĕçне тÿрĕ кăмăлпа туса пынă. Çар вĕренĕвĕн итогĕсем тăрăх унăн взвочĕ отличниксен шутне кĕнĕ. Икĕ çултан аслă лейтенант çăлтăрĕсемпе пĕрле батарея командирĕн должноçне те йышăннă. Тепĕр виçĕ çултан капитана артиллери дивизионĕн командирĕн заместителĕ пулма çирĕплетнĕ.
2010 çулхи сентябрьтенпе Сергей Гордеев майор Кăнтăр çар округĕнчи Новороссийск хулинче службăра тăрать. Вăл – ракетăпа артиллери дивизионĕн командирĕ. Ку должнăç, паллах, питĕ, яваплă. Сергей Петровичăн подразделенийĕнче – 19 офицер. Сержантсемпе салтаксем те йышлă. Вĕсен службине командир професилле ăсталăхпа йĕркелесе тăрать, штаб палăртнă çар-тактика вĕренĕвĕн планĕ хăйне шанса панă дивизионта туллин пурнăçлантăр тесе тăрăшать.
Сергей Гордеев хăйĕн тивĕçне яланах Присяга тата çар командованийĕ хушнă пек чыслăн туса пырать. Çакна "Паттăрлăх" орденĕпе Суворов медалĕ, Грамотăсемпе тав хучĕсем те çирĕплетеççĕ. Энтĕрьел йĕкĕчĕ (Сергей Петрович авланман-ха) кăçал çар академине вĕренме кĕме ĕмĕтленет.
Пултаруллă ентешĕмĕре службăра çĕнĕ çитĕнÿсем сунатпăр.