22 февраля 2011 г.
Раççей Геройĕпе Олег Долговпа пĕр ялта – Шамкайра çуралнă Н.Мандрюков. Вĕсен килĕсем те инçех пулман. Кольăн ачалăхĕ вара кайран Кивĕ Чукалпа çыхăннă, вăл кунта ÿссе çитĕннĕ. Салтака та çак тăрăхранах ăсатнă ăна.
Оренбург облаçĕнчи пĕр çар чаçĕнче службăра тăрать паян йĕкĕт. Ялта та лайăхпа çеç палăрса тăнăскер, çарта та маттур салтак вăл. Çакна унăн ашшĕ-амăшĕ ячĕпе килнĕ Тав çырăвĕ те лайăх çирĕплетет. Унта Николай службăра тăракан рота командирĕ Виктор Николаевичпа Галина Васильевнана Тăван çĕр-шывăн шанчăклă сыхлавçине, маттур салтак çуратса ÿстерсе тивĕçлĕ воспитани панăшăн тав тунă.
Н.Мандрюков мотострелоксен подразделенийĕнче пысăк авторитетлă. Ăна юлташĕсем те, командирсем те хисеплеççĕ. Николай командирсен тавне те пĕрре çеç мар тивĕçнĕ.
Пирĕн ентеш ялтан инçетре те чăваш ятне яманни кашнинех савăнтарать.