02 марта 2011 г.
ШАРТЛАМА сивве пăхмасăр, иртнĕ кĕçнерни кун палтиелсем ялти Культура çуртне пухăнчĕç. Лăк тулли зал. Куракансем хальхинче черетлĕ смотр-отчет концертне пăхрĕç. Ял поселенийĕн вăйĕпе хатĕрленĕ программăна Космонавтика çулĕпе çыхăнтарнă. Пуян та тулли содержаниллĕ вăл. Чăваш, тутар, вырăс халăх юрри-сăвви, тĕрлĕ халăх ташши, шÿт-кулă пулчĕ унта.
Куракансем уйрăмах хор шăрантарнă "Люблю тебя, моя Россия", "Чÿречене яри те уçса ярăр", хĕр арăмсен репертурĕнчи юрăсене, фольклор ушкăнĕн юрри-ташшине ăшшăн йышăнчĕç. Татьянăпа Николай Долговсен, Алиса Лукьяновăпа Илья Зайцев, Галина Габитовăпа Николай Долгов, Надежда Стратилатовăпа Лилия Макарова, Анна Стратилатовăпа Ольга Долгова дуэтпа юрлани пурин кăмăлне те çĕклерĕ. Татьяна Долгова, Сирине Невметова, Гюзель Азизова пĕччен шăрантарнă вырăс, чăваш, тутар юррисем чĕрере чи ырă та çепĕç туйăмсене çуратрĕç. Долговсен çемье ансамблĕ парнеленĕ тăванлăх юрри нумайлăха асра юлĕ. Ашшĕпе амăшĕ, икĕ хĕрĕ (кĕçĕнни Аксинья – тăваттăра!) юрлани те, хитре хусканусем туни те – веçех илĕртÿллĕ, килĕшÿллĕ! "Трио" номинацире ялти вăтам шкул вĕренекенĕсем – Павел Токмаков, Илья Зайцев, Вениамин Долгов тата Кристина Кузьмина, Кристина Долгова, Алена Стратилатова палăрчĕç.
Концерт программин тĕп шăнăрĕ – ташăсем. Çÿлерех асăннă хĕр ачасем ташланă "Хип-хоп", молдован тата Хĕвел тухăç халăхĕсен ташшисем чуна тыткăнларĕç. Гелюсе Сейфутдинова, Зиле Мусеева, Раиля Емдиханова кăтартнă "Тухтăр патĕнче" сценка куççуль тухичченех култарчĕ. А.Г. Николаев космонавта халалланă "Улăп паттăр чĕрере" сăввипе çак йĕркесен авторĕ паллаштарчĕ. Концерта Надежда Стратилатовăпа Николай Долгов пысăк ăсталăхпа ертсе пычĕç. Федор Малов (Виçпÿрт Шăмăршă) вара кĕвĕ тĕлĕшĕнчен концерт илемне кÿчĕ. Жюри ял поселенийĕн концертне пысăк хак пачĕ, Культура çурчĕн администраторĕн Т.Долговăн ĕçĕ çÿллĕ шайрине палăртрĕ.