30 марта 2011 г.
ЧĂВАШ РЕСПУБЛИКИН Шалти ĕçсен министерствин ГИБДД управленийĕн ĕç планĕпе килĕшÿллĕн, пирĕн республикăра мартăн 21 – 31-мĕшĕсенче "Тимлĕ пул – каникул!" профилактика операцийĕ иртет. Ачасен çурхи каникулĕн тапхăрĕнче районти милицин ГИБДД уйрăмĕн сотрудникĕсем вăйлатнă режимлă ĕç кунĕ çине куçаççĕ, ачасем çул-йĕрсем çинче инкек ан курччăр тесе, ялсенче постсем йĕркелеççĕ, ăнлантару ĕçне пурнăçлаççĕ.
Хăш-пĕр шулсенче, çанталăк условийĕсене кура, каникула кăштах кая юлса яраççĕ. Çакна шута илсе, сотрудниксем апрелĕн пĕрремĕш декадинче те ялсене тухса çÿрĕç, ачасен çул-йĕрсем çинчи хăрушсăрлăхĕшĕн тимлĕç.
Каникул тапхăрĕнче ачасем урамсенче, çулсем хĕресленнĕ вырăнсенче тĕрлĕ вăйăсем выляççĕ, хăш-пĕрисем тимлĕх пирки манаççĕ. Çавна май водительсене урамсенче асăрхануллă пулма, хăвăртлăх режимне çирĕп пăхăнма сĕнетпĕр.