02 апреля 2011 г.
ÇĔНĔ ШУПАШКАРТА республикăри ача-пăча эстрадин "Çăлтăр çумăрĕ" ятлă III конкурсĕ пулса иртнĕ. Унта Шăмăршăри ача-пăча искусствин шкулĕнчи вокал уйрăмĕнче вĕренекенсем те хутшăннă.
"Вокал ансамблĕ" номинацире "Ăшă кулă" ансамбль III степень Диплома тивĕçнĕ. "Эстрада вокалĕ" номинацире вара Мария Константинова (преподавателĕ Т.Б. Яковлева) I степеньлĕ дипломант пулса тăнă. Çавăн пекех ку номинацире Анастасия Мердеевана та Дипломпа чысланă.
Çак кунсенче ача-пăча ÿкерчĕкĕсен Элли Юрьев ячĕллĕ X конкурс кăтартăвĕсене те пĕтĕмлетнĕ. Конкурса пĕтĕм республикипе 519 ĕç тăратнă. Шăмăршăри ача-пăча искусствин шкулĕнчи Аня Тинюкова (преподавателĕ З.П. Морозова), Юля Васильева тата Валя Родионова (преподавателĕ А.К. Краснова) ĕçĕсем хавхалантармалли приза тивĕçнĕ.
Раççей Космонавтикин çулне халалланă республика конкурсĕнче те Илья Михайлов (преподавателĕ З.П. Морозова) ĕçне хавхалантармалли призпа палăртнă.