09 апреля 2011 г.
ÇАМРĂКСЕНЕ ялта çирĕплетсе хăвармалли çинчен нумай калаçатпăр, çыратпăр. Ял ватăлса пыни пăшăрхантармасăр тăма пултараймасть. Ача сахал çуралнипе шкулсене хупма тивет, уй-хирте, фермăра ĕçлеме çамрăк специалистсем çитмеççĕ. Районта механизаторсем те ватăлса пыраççĕ. Хăш хуçалăхра 30 çула çитмен сухаçă пур-ши;
"Малашлăхсăр ялсем пулмалла мар!" – акă мĕнле чĕнÿ янăрать паян. Пĕчĕк ялсем патне те шанчăклă çулсем çитрĕç, кил хуçи хĕрарăмĕсем вутă хутса асапланмаççĕ. Анчах та ялта ытларахăшĕ – пенсионерсем. Çĕр çинче ĕçлеме вăй питти çынсен алли кирлĕ. Çавăнпа та эпир шкул пĕтерекен çамрăксене яла юлса харпăр-хăй ĕçне йĕркелеме, яла кирлĕ специальноçсене алла илсе тăван киле таврăнма, патшалăх пулăшнипе çурт-йĕр çавăрма чĕнсе калатпăр. Кадрсене ялта çирĕплетсе хăварасси – кун йĕркинчи пĕрремĕш ыйту.