11 мая 2011 г.
АПРЕЛĔН 29- мĕшĕнче Шупашкарта, К.В. Иванов ячĕллĕ Чăваш патшалăх академи драма театрĕнче чи лайăх ĕç династийĕсен IX слечĕ иртнĕ. Чаплă уява хутшăнакансене Чăваш Республикин Президенчĕ М.В. Игнатьев чĕререн саламланă, пултаруллăхшăн, ĕçченлĕхшĕн тав тунă. Президент ĕç династийĕсен паха йăлисене аталантарса пыракансене Тав çырăвĕпе, хаклă парнепе чысланă.
Пирĕн районтан слета Патирекре çуралса ÿснĕ Севрюгинсен çемье династийĕ хутшăннă.
Династие пуçараканĕ – Петр Петрович – ĕмĕрĕ тăрăшшĕпех тăван "Искра" колхозра вăй хунă. Мăшăрĕ – Анастасия Никифоровна та 46 çул хушши колхозра ĕçленĕ. Севрюгинсем пилĕк ача çуратса ÿстернĕ, пурте тенĕ пекех çĕр ĕçченĕн профессине суйласа илнĕ. Çемье династийĕн пĕтĕмĕшле ĕç стажĕ – 187 çул.