14 мая 2011 г.
Валентина Ивановна – вырăс хĕрĕ, апла пулин те чăвашла таса та илемлĕ калаçать, юрăсем те нумай пĕлет. Мăшăрĕпе - Николайпа – виçĕ хĕр çуратса ÿстернĕ, пурнăç çулĕ çине кăларнă. Андреевсен çемйи Вырăс Чукал ялĕнче чи хисеплисенчен пĕри. Килти хуçалăхра лаша, ĕне, сысна усраççĕ, çĕр-аннене чунтан юратаççĕ.
Валентина Ивановна нумай çул хушши тăван колхозра бухгалтерта ĕçленĕ, каярахпа суту-илÿре вăй хунă. Ăçта ĕçлесен те ырă ятлă пулнă.
Николай – шофер, хăйне шанса панă автомашинăпа çĕр-çĕр çухрăм çул çÿренĕ. Хастар ĕçшĕн ăна Хисеп грамотипе пĕрре çеç мар чысланă. Техникăна юратнăран, тракторпа та ĕçлет, килти хушма хуçалăхне аталантарать. Кÿршисене пулăшма та ÿркенмест.
Иртнĕ кунсенче çеç-ха Андреевсен туслă кил-йышĕнче пысăк уяв пулчĕ – Валентина Ивановна 55 çул тултарнине савăнăçлăн паллă турĕç. Çирĕп сывлăх, телей, вăрăм ĕмĕр сунать ăна ял-йыш.