18 мая 2011 г.
ПĔТĔМ ТĔНЧЕРИ Çемье кунĕ умĕн районти ЗАГС пайĕнче чи телейлĕ çынсене – ĕмĕр тăршшĕпе кăвакарчăнсем пек килĕштерсе пурăнакан мăшăрсене чаплă лару-тăрура чысларĕç. Залра – «бриллиант» юбилярсем Валентин Григорьевичпа Лидия Вячеславовна Шикинсем (Пăчăрлă Пашьел), «ылтăн» юбилярсем Юрий Михайловичпа Валентина Петровна Фроловсем (Шăмăршă), «кĕмĕл» юбилярсем – Менсур Мягсумовичпа Эльзия Минигалиевна Шариповсем (Патирек), «кĕленче» юбилярсем – Юрий Валентиновичпа Елена Петровна Яковлевсем (Çĕнĕ Тăрăн) тата мăшăрланнăранпа пурĕ те пĕр эрне çеç çитнĕ Анастасияпа Роман Филипповсем (Энтĕрьел), вĕсен тăванĕсемпе çывăх çыннисем.
Телейлĕ мăшăрсене район администрацийĕн пуçлăхĕ В.П.Фадеев чĕререн саламларĕ, çирĕп сывлăх, телей, юрату сунчĕ. Валерий Петрович юбилярсене Тав çырăвĕпе, чечек çыххипе тата парнепе чысларĕ.