04 июня 2011 г.
ПĔТĔМ тĕнчери ачасене хÿтĕлемелли кун Шăмăршăра пĕчĕккисем валли пысăк уяв йĕркелерĕç. Унта ачасемпе пĕрлех вĕсен ашшĕ-амăшĕ те хутшăнчĕ.
Уяв ячĕпе район администрацийĕн пуçлăхĕ В.П. Фадеев, Чăваш Республикинчи халăха ĕçпе тивĕçтерекен Патшалăх службин ертÿçи С.П. Димитриев пурне те ăшшăн саламларĕç, ачасем пирĕн савăнăç тата пурнăç тĕллевĕ, çĕр-шыв пуласлăхĕ пулнине палăртрĕç. Сергей Петрович нумай ачаллă Матвеевсен, Захаровсен тата Евграфовсен çемйисене килти хушма хуçалăха аталантарма тÿлевсĕрех çĕр лаптăкĕ уйăрса панине çирĕплетекен сертификат пачĕ.
Вăйăсемпе конкурссем, юрă-ташă уява илем кÿчĕç, пурне те савăнăç парнелерĕç. Конкурссене хутшăнакансене пĕчĕк парнепе хавхалантарни те ачасен кăмăлĕсене çĕклерĕ.