18 июня 2011 г.
Владимир Иванович Скворцов (ÿкерчĕкре) хĕрĕх çула яхăн "Искра" ял хуçалăх кооперативĕнче трактористра ĕçлет. Вырма вăхăтĕнче вăл комбайн çине ларать, хăй акнă тыр-пула хăех пуçтарса кĕртет.
Çурхи ака-сухара хастар ĕçленĕшĕн кăçалхи Акатуйра В.И. Скворцова район администрацийĕн Хисеп грамотипе чысларĕç.
Сăмах май каласан, Владимир Ивановичăн тетĕшĕ Михаил Иванович 45 çул тракторпа ĕçленĕ, «Чăваш Республикинчи çамрăксен чи лайăх наставникĕ» ята тивĕçнĕ. Скворцовсен çемье династийĕ малалла тăсăлать, ывăлĕсем те ашшĕсен çулĕпе утаççĕ. Вĕсем пурте тракторпа ĕçлеме пултараççĕ, çĕр-аннене юратаççĕ.