29 июня 2011 г.
УТĂ пулсан выльăхсем тутă пуласси мĕн ĕлĕкренех паллă. Çумăрсем пуçланиччен хăшĕсем ăна кăштах та пулин хатĕрлесе хăварма ĕлкĕрнĕччĕ, паккуссене пухса кĕртнĕччĕ. Çанталăк пăсăлсан, çумăрсем вăраха кайсан, хăш-пĕр çĕрте утă пăсăлнă тĕслĕхсем те пулмарĕç мар. Уйрăм çынсем те çакна пытармаççĕ.
Тăпрара халĕ нÿрĕк çителĕклех. Çавна май нумай тата пĕр çул ÿсекен курăксем çÿллĕ ÿссе кайрĕç, вĕсем çырма-çатра таврашĕнче те çителĕклех. Çанталăк каллех уяртрĕ те - уйрăм çынсем, фермер хуçалăхĕсем, пĕрлешÿллĕ хуçалăхсем каллех утă çине тухрĕç: кашниех выльăх апатне ытлă-çитлĕ хатĕрлесе хăварасшăн. Çавăнпа пурте хĕвеллĕ çанталăкпа туллин усă курса юласшăн.